ڊپٽي ڪمشنر ٺٽو پاران ڌاٻيجي ۾ کليل ڪچھري منعقد، عوامي مسئلا ٻڌا

ڊپٽي ڪمشنر ٺٽو پاران ڌاٻيجي ۾ کليل ڪچھري منعقد، عوامي مسئلا ٻڌا

ٺٽو (محمد شفيق ڀٽي) ڊپٽي ڪمشنر اسد علي خان يونين ڪائونسل ڌاٻلجي ۾ کليل ڪچھري منعقد ڪري تعلقي ميرپور ساڪرو خاص طور تي ڌاٻيجي، مارڪيٽ، گهارو (تپو گهارو) جي زميندارن جا مسئلا ٻُڌي درخواستون وصول ڪيون ۽ لاڳاپيل عملدارن کي موقعي تي ئي حڪم پڻ جاري ڪيا. ان موقعي تي ڊپٽي ڪمشنر چيو ته جيڪي کاتيدار پنهنجي زمينن جا دستاويز ٺھرائي ناھن سگھيا اهي جلد اسسٽنٽ ڪمشنر جي آفيس ۾ ڪليم داخل ڪن ته جيئن حقن جي رڪارڊ جي بحالي جو ڪم شروع ڪري سگهجي. عوام پاران ڪيل شڪايتن تي ڊپٽي ڪمشنر تعلقي ميرپور ساڪرو جي اسسٽنٽ ڪشنر اقبال احمد تنيو ۽ مختيارڪار احمد ميمڻ کي هدايت ڪئي ته شڪايت ڪندڙن جي زمينن جي جانچ ڪري سندن جائز مسئلا فوري طور حل ڪيا وڃن جڏهن ته شهيد ذوالفقار علي ڀٽو انسٽيٽيوٽ آف سائنس اينڊ ٽيڪنالاجي (زيبسٽ) توڙي اڪنامڪ زون ڌاٻيجي انتظاميا ۽ مقامي ماڻهن سان گڏجي مختص زمينن جي حد بندي ڪري مقامي ماڻھن جا خدشہ دور ڪيا وڃن. ڊپٽي ڪمشنر چيو ته ڌاٻيجي، مارڪيٽ ۽ گهارو ۾ قائم هائوسنگ اسڪيمن جي انتظاميہ کي طلب ڪري گهربل دستاويز چيڪ ڪيا وڃن جڏهن ته غيرقانوني اسڪيمن کي سيل ڪري هائوسنگ اسڪيمن جي احاطي ۾ ايندڙ زمينون اصل کاتيدارن جي حوالي ڪيون وڃن ۽ هائوسنگ اسڪيم مالڪن خلاف قانوني ڪارروائي پڻ ڪئي وڃي. هن چيو ته سنڌ جي ثقافت کاتي جي عملدارن سان رابطو ڪري ڀنڀور جي زمينن تي غير قانوني قبضا ڪندڙن خلاف ڪارروائي ڪئي وڃي ته جيئن آثار قديمه جي سرڪاري ايراضي کي محفوظ ڪري سگهجي. يونين ڪائونسل ڌاٻيجي جي اڳوڻي ايڊمنسٽريٽر پاران غيرقانوني دڪانن جي اڏاوت بابت ڪيل شڪايت تي ڊپٽي ڪمشنر اسسٽنٽ ڪمشنر کي هدايت ڪئي ته دڪانن کي فوري طور ڊاهي يونين ڪائونسل ۽ پارڪ کي اصل شڪل ۾ بحال ڪري غيرقانوني اڏاوت ۾ ملوث عنصرن خلاف ايف آءِ آر پڻ داخل ڪرائي وڃي. هن چيو ته يونين ڪائونسل ڌاٻيجي جي آفيس جي مرمت ۽ بحالي لاءِ پڻ ڪوششون ورتيون وينديون. علائقي ۾ قائم فيڪٽرين ۽ صنعتن پاران زهريلي پاڻي ۽ دونهين جي اخراج سميت مقامي ماڻهن کي روزگار ۽ ٻين سهولتن جي فراهمي ۾ نظر انداز ڪرڻ بابت ڪيل شڪايتن تي ڊپٽي ڪمشنر اسسٽنٽ ڪمشنر کي هدايت ڪئي ته فيڪٽرين جي انتظاميه کي گهارو شھر ايندڙ کلي ڪچھري دوران شرڪت لاءِ پابند ڪيو وڃي ته جيئن مقامي ماڻهن جي روزگار ۽ ٻين مسئلن کي حل ڪري سگهجي. هن چيو ته نيشنل هاءِ وي تان غيرقانوني حددخليون ۽ ناجائز قبضہ هٽائڻ لاءِ فوري ڪارروائي ڪئي وڃي ته جيئن ماڻهن کي آمدرفت ۾ آساني پيدا ٿي سگهي. پيئڻ جي صاف پاڻي، صحت ۽ ٻين بنيادي مسئلن بابت ڪيل شڪايتن تي ڊپٽي ڪمشنر اسد علي خان چيو ته پبلڪ هيلٿ، صحت ۽ ٻين لاڳاپيل کاتن جي عملدارن ان حوالي سان فوري قدم کڻن لاءِ پابند بنايو ويندو ته جيئن عوام کي بنيادي سهولتن جي فراهمي کي يقيني بڻائي سگهجي.