چيف سيڪريٽري سنڌ ڊاڪٽر محمد فخر عالم جي صدارت هيٺ اهم اجلاس

چيف سيڪريٽري سنڌ ڊاڪٽر محمد فخر عالم جي صدارت هيٺ اهم اجلاس

ڪراچي (اسٽاف رپورٽر) سنڌ ۾ عام چونڊن جي تيارين جي حوالي سان چيف سيڪريٽري سنڌ ڊاڪٽر محمد فخر عالم جي صدارت هيٺ سنڌ سيڪريٽريٽ ۾ اهم اجلاس ٿيو. اجلاس ۾ صوبائي اليڪشن ڪمشنر سنڌ اعجاز انور چوهاڻ، جوائنٽ صوبائي اليڪشن ڪمشنر علي اصغر سيال، گهرو سيڪريٽري محمد اقبال ميمڻ، ڪمشنر ڪراچي محمد سليم راجپوت، سيڪريٽري جنرل ايڊمنسٽريشن محمد علي کوسو، سيڪريٽري اطلاعات نديم الرحمان ميمڻ، ڪور 5، پاڪستان رينجرز ۽ پوليس جي نمائندن ۽ ٻين لاڳاپيل آفيسرن شرڪت ڪئي. اجلاس ۾ سمورن ڊويزنل ڪمشنرن ۽ ڊپٽي ڪمشنرن شرڪت ڪئي. اجلاس ۾ سنڌ ۾ عام چونڊن جي حوالي سان سڪيورٽي ۽ ٻين انتظامن جو جائزو ورتو ويو. اجلاس کي خطاب ڪندي سنڌ جي چيف سيڪريٽري ڊاڪٽر محمد فخر عالم چيو ته سنڌ حڪومت اليڪشن ڪميشن جي هدايتن تي شفاف، منصفاڻي ۽ محفوظ چونڊن لاءِ پرامن ماحول پيدا ڪري رهي آهي. هن چيو ته پولنگ اسٽيشنن تي سمورين سهولتن جي دستيابي کي يقيني بڻايو ويندو، اليڪشن ڪميشن جي هدايتن تي حساس پولنگ اسٽيشنن تي سي سي ٽي وي ڪيمرا لڳايا ويندا. هن وڌيڪ چيو ته سنڌ حڪومت عام چونڊون ڪرائڻ لاءِ اليڪشن ڪميشن کي مڪمل سهڪار فراهم ڪندي. اجلاس ۾ چيف سيڪريٽري سنڌ سيڪريٽري اسڪول ايجوڪيشن کي هدايت ڪئي ته معذورن جي سهولت لاءِ هر پولنگ اسٽيشن تي ريمپ جي تعمير کي يقيني بڻايو وڃي. اجلاس کي بريفنگ ڏيندي صوبائي اليڪشن ڪمشنر اعجاز انور چوهاڻ چيو ته عام چونڊن لاءِ پولنگ عملي جي ڀرپور تربيت ڪئي ويندي. اليڪشن ڪميشن ضلعي رٽرننگ آفيسرن، رٽرننگ آفيسرن سميت سموري پولنگ عملي جي تربيت کي يقيني بڻائيندو. هن وڌيڪ چيو ته اليڪشن ڪميشن جي گذريل اجلاس ۾ ڏنل هدايتن جي روشني ۾ اڄ هڪ جائزو اجلاس طلب ڪيو ويو آهي. صوبائي اليڪشن ڪمشنر سنڌ اعجاز انور چوهاڻ وڌيڪ چيو ته سنڌ ۾ قومي اسيمبلي جي 61 ۽ صوبائي اسيمبلي جي 130 سيٽن تي چونڊون ٿينديون. صوبي ۾ 19 هزار 200 پولنگ اسٽيشنون ٺاهيون وينديون. چونڊن ۾ سڄي صوبي ۾ 2 لک 27 هزار 424 سرڪاري ملازمن جون خدمتون ورتيون وينديون. اجلاس ۾ پوليس عملدارن ٻڌايو ته سڪيورٽي پلان تيار ڪيو ويو آهي، سنڌ ۾ عام چونڊن ۾ 1 لک 45 هزار 334 پوليس اهلڪار سڪيورٽي جا فرض سرانجام ڏيندا.