ڪراچي جي سچل ڳوٺ ۾ بلدياتي چونڊن ۾ ڪامياب ٿيل چيئرمين ۽ ڪائونسلرن جي مان ۾ آجياڻو

ڪراچي جي سچل ڳوٺ ۾ بلدياتي چونڊن ۾ ڪامياب ٿيل چيئرمين ۽ ڪائونسلرن جي مان ۾ آجياڻو

گڏاپ (محمد علي خاصخيلي) ڪراچي سچل ڳوٺ ۾ بلدياتي چونڊن ۾ ڪامياب ٿيل چيئرمين ۽ ڪائونسلرن جي مان ۾ ڪائونسلر سهيل سولنگي ۽ ساٿين طرفان آجياڻو ڏنو ويو جنهن جي صدارت پ پ ڪراچي اوڀر جي ضلعي ڪوآرڊيبيٽر آصف خان جي هئي ۽ خاص مهمان چيئرمين صفوره ٽائون راشد خاصخيلي هو جڏھن اعزازي مهمانن ۾ حاڪم جسڪاڻي, اقبال ساند, ميڊم نصرت ڏيپر, چيئرمين يوسي 3 سچل ڳوٺ تاج محمد وساڻ, چيئرمين يوسي 4 بشير خاصخيلي, چيئرمين يوسي 1 ثاقب, سيد احمد شاھ ڪاظمي ۽ ٻيا شامل هئا تقريب ۾ شرڪت ڪندڙ مهمانن کي سنڌ جي سوکڙي اجرڪ پڻ اوڍايا ويا ۽ ڪائونسلر سهيل سولنگي آيل مهمانن جي آجيان ڪئي. پروگرام جي ڪارروائي خالد چنا ۽ يعقوب سولنگي هلائي.ان موقعي تي تقريب کي خطاب ڪندي اڳواڻن چيو ته 1977ع ۾ اڳوڻي آمر ۽ ڊڪٽيڪٽر جي دور ۾ جمهوريت ۽ آئين جو قتل ڪيو ويو هو, ان دور ۾ آمريت خلاف ڳالهائڻ ۽ لکڻ وڏو گناھ سمجهيو ويندو هو, ان ظالماڻي عمل مان به پيٽ نه ڀريو ته وري محترمه بينظير ڀٽو کي به شهيد ڪرايو ويو. اڳواڻن وڌيڪ چيو ته سچل ڳوٺ پ پ وڻ آھي ۽ عبدالله شاھ غازي ڳوٺ, ماروئڙا ڳوٺ, شاهنواز شر ڳوٺ, شھيد مخدوم بلاول ۽ ٻيا علائقا ان جون شاخون آھن, ھنن وڌيڪ چيو ته پ پ جي عوام ۾ مقبوليت سبب مخالفن جون ننڊون حرام ٿي ويون آھن. ايندڙ اليڪشن ۾ پارٽي طرفان جنهن به اميدوار کي ٽڪيٽ ملندي اسان سڀ گڏجي ان جا هٿ مضبوط ڪنداسين. ٽائون چيئرمين راشد خاصخيلي چيو ته منهنجو ننڍپڻ سچل ڳوٺ ۽ ڀرپاسي وارن علائقن ۾ کيڏندي ۽ گهمندي گذريو آھي منهنجي ڪوشش آھي ته مان پنهنجن علائقن ۾ ايترا ترقياتي ڪم ڪرايان جو ايندڙ اليڪشن ۾ چونڊجي ايندڙ ايم پي اي ۽ ايم اين اي چون ته هتي سڀ سهولتون موجود آھن ۽ ھاڻي اسان ٻيو ڪهڙو ترقياتي ڪم ڪرايون. ان موقعي تي پ پ ليڊيز اڳواڻ غلام سڪينه ڪلر, پروين طارق معشوق منگي, اڪبر شاه ڪاظمي ۽ ٻين شرڪت ڪئي.