نوشھروفيروز ۾ بدامني خلاف پوسٽ شيئر ڪرڻ تي نوجوان گرفتار

نوشھروفيروز ۾ بدامني خلاف پوسٽ شيئر ڪرڻ تي نوجوان گرفتار

نوشهروفيروز( ڊر) شھر ۾ وڌندڙ بدامني خلاف سوشل ميڊيا تي پوسٽون رکندڙ نوجوان کي پوليس گرفتار ڪري ورتو. نوجوان احسان کوسي بدامني ۽ پوليس خلاف مسلسل سوشل ميڊيا تي پوسٽون رکندو رھيو آھي. جنھن تان ڪاوڙ ۾ اچي نوشهروفيروز پوليس نوجوان کي گرفتار ڪري مٿس ڪيس داخل ڪري ڇڏيو آھي. نوجوان تي ڪيس داخل ڪرڻ خلاف شھري سراپا احتجاج بڻجي ويا آھن. شھرين پريس ڪلب نوشهروفيروز آڏو احتجاجي مظاھرو ڪيو ۽ پوليس خلاف نعري بازي ڪئي. ان موقعي تي شھرين نويد راڄپر، اسد چانڊيو ۽ ٻين چيو ته نوجوان احسان شھري ايڪشن ڪميٽي جو اڳواڻ آھي جيڪو شھر ۾ وڌندڙ بدامنيءَ خلاف سوشل ميڊيا تي مھم ھلائڻ سان گڏ احتجاج ڪري رھيو ھو پر نوشھروفيروز پوليس بدامني تي ضابطو آڻڻ بجاءِ نوجوان تي ڪوڙو ڪيس داخل ڪري نااھلي ظاھر ڪئي آھي. ھنن چيو ته ھن وقت به شھر بدامني جي ور چڙھيل آھي. منشيات ۾ ھيروئن، چرس، آفيم ۽ آئيس جو سرعام وڪرو ٿي رھيو آھي پر پوليس منشيات فروشن ۽ ڏوھارين کي گرفتار ڪرڻ بجاءِ شريف شھرين کي ھيسائي رھي آھي. ھنن چيو ته نوجوان احسان کوسي تان ڪيس ختم نه ڪيو ويو ته احتجاج جو دائرو وڌايو ويندو.