آءِ جي سنڌ رفعت مختار راجا جي صدارت هيٺ اهم اجلاس

امن امان جي موجوده صورتحال سميت ايندڙ ڏينهن ۾ رٿيل اهم ايونٽس بابت غور ويچار

ڪراچي(اسٽاف رپورٽر) ڪراچي پوليس آفيس ۾ آءِ جي سنڌ رفعت مختار راجا جي صدارت هيٺ اهم اجلاس ٿيو، جنهن ۾ امن امان جي موجوده صورتحال سميت ايندڙ ڏينهن ۾ رٿيل اهم ايونٽس جي سيڪيورٽي بابت خيالن جي ڏي وٺ ڪئي وئي. اجلاس ۾ اسٽريٽ ڪرائم، گٽڪا ماوا ۽ ٻين ڏوهن خلاف پوليس جي ڪارڪردگي جو به جائزو ورتو ويو. پوليس ترجمان موجب آءِ جي سنڌ خاص طور اسٽريٽ ڪرائم ۽ ٻين ڪيسن ۾ پيش رفت بابت ڄاڻ ورتي. آءِ جي سنڌ چيو ته اسٽريٽ ڪرمنلز کي هرگز نه ڇڏيو وڃي، منشيات، گٽڪا مافيا خلاف ڪارروائيون تيز ڪيون وڃن، ڏوهن تي ضابطو آڻڻ لاءِ سمورا اپاءَ ورتا وڃن. آءِ جي سنڌ چيو ته ٻڌايو وڃي ته گرفتار جوابدارن مان ڪيترا عادي ڏوهاري آهن، جوابدارن جي سڃاڻپ پريڊ جي عمل بابت ٻڌايو وڃي، ڏوهارين کي پرو ايڪٽو پوليسنگ تحت قانون جي گرفت ۾ آندو وڃي، اسٽريٽ ڪرمنلز، مفرور/اشتهاري جوابدارن خلاف ڪريڪ ڊائون ۾ انٽيليجنس معلومات کي اهميت ڏني وڃي، ڪرائيم اينالائيسز کي سامهون رکندي ڏوهن خلاف ڪارروائي تيز ڪئي وڃي، آپريشنل ۽ انويسٽيگيشن پوليس گڏجي ڏوهن خلاف ڪارروائي ڪري، جاچ جو معيار جيترو مضبوط هوندو، جوابدارن جي گرفتاري به وڌيڪ مضبوط ٿيندي، پوليس تي شهرين جو اعتماد مضبوط ڪرڻ لاءِ برادرين کي گڏ کڻي هلو، اسان کي شهرين جي خدمت جو مثال بڻجڻو پوندو. پوليس ترجمان موجب ايڊيشنل آءِ جي ڪراچي خادم حسين رند اجلاس ۾ شهر ۾ ڏوهن جي صورتحال ۽ پوليس ڪريڪ ڊائون بابت بريفنگ ڏني.