قومي عوامي تحريڪ جي وفد جي ڊي سي ۽ ايس ايس پي حيدرآباد سان ملاقاتون

اليگل اميگرينٽس جي نشاندهي بابت ڊي سي حيدرآباد جي چوڻ باوجود نادرا عملو تعاون نٿو ڪري: ايس ايس پي امجد شيخ

حيدرآباد(بيورو) قومي عوامي تحريڪ جي سربراھ اياز لطيف پليجو جي ھدايت تي قومي عوامي تحريڪ جو وفد ڊپٽي ڪمشنر ۽ ايس ايس پي حيدرآباد سان ملاقات ڪري کين غير قانوني افغانين جي نيڪالي بابت اياز لطيف پليجي جو پيغام ڏنو ۽ تفصيلي ڳالھ ٻولھ ڪئي. قومي عوامي تحريڪ جي سينيئر ڊپٽي جنرل سيڪريٽري الطاف خاصخيلي، جوائنٽ سيڪريٽري خادم سمون، نذير احمد بليدي، غلام نبي سومرو ۽ معشوق چانڊيو جي اڳواڻي ۾ وفد شھباز بلڊنگ ۾ ڊپٽي ڪمشنر حيدرآباد طارق قريشي ۽ ايس ايس پي امجد شيخ سان ڌار ڌار ملاقات ڪري غير قانوني افغانين جي نيڪالي بابت ڳالھ ٻولھ ڪئي. ملاقات ۾ ڊي سي حيدرآباد قومي عوامي تحريڪ جي وفد جي ٻڌايو تہ اڃا تائين حيدرآباد ۾ ھڪ به غير قانوني افغاني گرفتار ناھي ٿيو. اليگل اميگرينٽس بابت ميپنگ ڪئي وئي آھي. 2 ھفتن اندر آپريشن ڪيو ويندو. ايس ايس پي امجد شيخ چيو تہ اليگل اميگرينٽس جي نشاندهي بابت ڊي سي حيدرآباد جي چوڻ باوجود نادرا تعاون ڪرڻ لاء تيار ناھي. آئي جي سنڌ جو حڪم آھي تہ شناختي ڪارڊ رکندڙ کي گرفتار ناھي ڪرڻو. غير قانوني افغانين کي واپس ڪرڻ لاء ڪوششون ڪري رھيا آھن. وفد ۾ شامل اڳواڻن الطاف خاصخيلي ۽ خادم سمون چيو تہ غير قانوني افغاني حيدرآباد ۾ گنجو ٽڪر، لطيف آباد 10، 11 نمبر، ھالا ناڪہ، بدين بس اسٽاپ، نئين پل، ھٽڙي سميت مختلف علائقن ۾ ڪالونيون ٺاھي ويٺل آھن، لوڪل گورنمينٽ جا ادارا ۽ نادرا رشوت وٺي ڪوڙا ڪاغذ ٺاھي غير قانوني افغانين کي تحفظ ڏئي رھيا آھن.