ٺٽي ۾ صوبائي جوائينٽ اليڪشن ڪمشنر جي صدارت ھيٺ ڊي سي آفيس ۾ گڏجاڻي

ايندڙ چونڊن جي حوالي سان اڳواٽ سمورن انتظامن جو بندوبست ڪيو وڃي: علي اصغر سيال

ٺٽو(محمد شفيق ڀٽي) صوبائي جوائنٽ اليڪشن ڪمشنر سنڌ علي اصغر سيال ڊپٽي ڪمشنر ٺٽو اسد علي خان ۽ ضلعي اليڪشن ڪمشنر محمد عمران آرائين سميت مختلف لاڳاپيل کاتن جي عملدارن کي هدايت ڪئي آهي ته ھو ايندڙ چونڊن کان اڳ سمورين پولنگ اسٽيشننز جي عمارتن جي مرمت سميت پاڻي، بجلي، بائونڊري وال، باٿروم، فرنيچر ۽ معذور ماڻهن لاءِ ريمپ جي سھولتن کي جلد کان جلد يقيني بڻايو وڃي ته جيئن هر شهري پنهنجي ووٽ جو بنيادي حق استعمال ڪري سگهي ۽ پولنگ عملي کي به مشڪلاتن کان بچائي سگهجي. اهڙيون هدايتون هُن ڊپٽي ڪمشنر آفيس ۾ ھڪ گڏجاڻي جي صدارت ڪندي ڏنيون . ھن وڌيڪ چيو ته چونڊون صاف ،شفاف ،غير جانبداراڻه ۽ پر امن طريقي سان ڪرائڻ اليڪشن ڪميشن ۽ حڪومت جي اولين ذميواري آهي ، ان ڏس ۾ ضلعي انتظاميه سمورا وسيلا ڪتب ۾ آڻيندي تمام انتظام مڪمل ڪرڻ ۾ پنھنجو ڀرپور ڪردار ادا ڪري - ان موقعي ڊپٽي ڪمشنر ۽ ضلعي اليڪشن ڪمشنر ضلعي ۾ عام چونڊن جي حوالي سان ۽ پولنگ اسٽيشننز ۾ ڪيل انتظامن بابت تفصيلي بريفنگ پڻ ڏني . ان کان اڳ صوبائي جوائنٽ اليڪشن ڪمشنر سنڌ علي اصغر سيال ضلعي جي مختلف پولنگ اسٽيشننز جو دورو ڪري سمورن انتظامن ۽ سھولتن جو جائزو پڻ ورتو-