ڪراچي: ضلعي اوڀر جي مختلف علائقن ۾ عطائي ڊاڪٽرن خلاف ڪارروائيون تيز

سنڌ ھيلٿ ڪيئر ڪميشن جي ٽيم کي ڏسندي ئي عطائي ڊاڪٽرن ۾ ڀاڄ پئجي وئي

گڏاپ(رپورٽر)ڪراچي سنڌ هيلٿ ڪيئر ڪميشن جي سي اي او ۽ ڊائريڪٽر اينٽي ڪوئيڪري جي ھدايتن تي ضلعي اوڀر جي مختلف علائقن ۾ عطائي ڊاڪٽرن خلاف ڪارروائيون تيز ڪري ڇڏيون. سنڌ ھيلٿ ڪيئر ڪميشن جي ٽيم کي ڏسندي عطائي ڊاڪٽرن ۾ ڀاڄ پئجي وئي. ٽيم ۾ سنڌ هيلٿ ڪيئر ڪميشن جي ڊپٽي ڊائريڪٽر نعمان، ڊپٽي ڊائريڪٽر محسن، اسسٽنٽ ڊائريڪٽر اويس سومرو ۽ ٻين آفيسرن شرڪت ڪئي. ان موقعي تي ڊپٽي ڊائريڪٽر محسن چيو ته ڪراچي ۾ سياسي اثر رسوخ رکندڙ عطائي ڊاڪٽر تمام گهڻا آهن. بااثر ماڻهن جي غير قانوني ميڊيڪل سينٽرن خلاف ڪارروائيون تيز ڪيون ويون آهن. عطائي ڊاڪٽرن جي غير موجودگي ۾ سنڌ هيلٿ ڪيئر ڪميشن جا آفيسر ضلعي اوڀر جي مختلف علائقن ۾ ڪم ڪري رھيا آھن. آپريشن دوران ٽن کان وڌيڪ غير قانوني ڪلينڪن کي سيل ڪيو ويو آهي. ھن چيو ته سنڌ هيلٿ ڪيئر ڪميشن جي ٽيمن شهرين جي جان بچائڻ لاءِ ڪارروايون ڪيون آھن. ڊپٽي ڊائريڪٽر چيو ته سڄي سنڌ ۾ عطائي ڊاڪٽرن شھرين جي زندگيءَ سان کيڏي رھيا آھن. غلط ميڊيسن ۽ انجيڪشن لڳڻ ڪري ماڻهن جي زندگي اجڙي وئي آهي ۽ ھو مختلف بيمارين ۾ مبتلا ٿي ويا آھن. شهرين کي تحفظ فراهم ڪرڻ لاءِ ڪوششون جاري آهن، ھن چيو شهري ادارن جو ساٿ ڏين ۽ اهڙن ڪلينڪ خلاف ادارن کي آگاهه ڪن ته جيئن قيمتي جانين جو تحفظ ٿي سگهي