ڪمند جو اگھ 600 روپيا مڻ مقرر ڪري جلد شگر ملون چالون ڪيون وڃن: اياز لطيف پليجو

views | 20th Oct 2023 • سنڌي خبرون

ڪمند جي ھر شئي ڪارائتي آھي پر آبادگارن کي ملندڙ کنڊ جي حساب سان بہ پئسا نٿا ڏنا وڃن

حيدرآباد(بيورو) قومي عوامي تحريڪ جي سربراھ اياز لطيف پليجي چيو آھي تہ ڪمند جو اگھ 600 روپيا مڻ مقرر ڪري جلد شگر ملون چالون ڪيون وڃن۔ حڪومت جو مقرر ڪيل اگھ 425 روپيا آبادگارن ۽ ھارين کي قبول ناھي۔ فصلن تي وڏا خرچ ٿين ٿا۔ ان حساب سان آبادگارن کي فيصلن جي قيمت نٿي ڏني وڃي۔ جنھنڪري زراعت بدحالي جو شڪار آھي۔ اياز لطيف پليجي چيو تہ ڪمند جي ھر شئي ڪارائتي آھي پر آبادگارن کي ملندڙ کنڊ جي حساب سان بہ پئسا نٿا ڏنا وڃن۔ ڪمند سميت جيڪو بہ فصل لھي ٿو، ڪڻڪ، ڦٽيون، ساريون ۽ ٻيا فصل لھن ٿا تہ انھن جا اگھ ڪيرائي آبادگارن ۽ ھارين جو معاشي قتل ڪيو وڃي ٿو. اياز لطيف پليجي چيو تہ سنڌ جي زراعت کي ھٿ وٺي تباھ ڪيو پيو وڃي جنهن سان آبادگارن ۽ ھارين کي تمام وڏو نقصان ٿيو آهي جنھن سان غربت ۾ وڏو اضافو ٿيو آھي، زراعت سنڌ جي معيشت آھي، ان کي لولو ۽ لنگڙو بنائي عوام کي بدحال بنايو ويو آھي، نقلي ٻج، ڀاڻي، نقلي زرعي دوائن ۽ پاڻي کوٽ جي ڪري آبادگارن ۽ ھارين جو معاشي قتل ٿيو آھي۔ انھي نقصان جي تلافي ٿيڻ گھرجي. ٽريڪٽر، زرعي مشينري سستيون ڪيون وڃن آبادگارن کي آسان شرطن تي قرض ڏنو وڃي.اياز لطيف پليجي چيو آھي تہ 40 لک افغانين ۽ ٻين غير قانوني پرڏيھين جا شناختي ڪارڊ ٺاھڻ ۾ ملوث نادرا عملي ۽ آفيسرن کي برطرف ڪري سندن خلاف سخت قانوني ڪارروائي ڪئي وڃي ۽ نشاندھي ڪيل لکين غير قانوني پرڏيھين کي فوري طور واپس موڪليو وڃي۔ اياز لطيف پليجي چيو تہ ملڪ ۾ جيڪو بہ غير قانوني پرڏيھي اچي ٿو ان جي آخري منزل ڪراچي آھي، جنھن سان سنڌي ماڻھو اقليت ۾ تبديل ٿي رھيا آھن۔ غير قانوني پرڏيھي سنڌ جي وسيلن، روزگار تي بار آھن ۽ امن امان لاء وڏو خطرو آھن.