20آڪٽوبر کان شگر ملن جون چمنيون ٻاريون وڃن: اياز لطيف پليجي جو مطالبو

ڪمند جو اگھ 425 روپيا في مڻ آبادگارن ۽ ھارين کي قبول ناھي، ڪمند جو اگھ 600 روپيا مڻ مقرر ڪيو وڃي

حيدرآباد (بيورو)قومي عوامي تحريڪ جي سربراھ اياز لطيف پليجي چيو تہ 20 آڪٽوبر کان شگر ملن جون چمنيون ٻاريون وڃن ۽ پھرين نومبر تي ڪمند جي پيڙھائي شروع ڪئي وڃي، وقت سر شگر ملون نہ ھلڻ ڪري ڪڻڪ جي پوکي سخت متاثر ٿئي ٿي جنهن ڪري ڪڻڪ جي اٽو جو وڏو بحران پيدا ٿي سگهي ٿو سنڌ ۾ 24 شگر ملز مان 19 شگر ملون زرداري ۽ سندس ساٿين جون آهن، ڪمند جو اگھ 425 روپيا في مڻ آبادگارن ۽ ھارين کي قبول ناھي، ڪمند جو اگھ 600 روپيا مڻ مقرر ڪيو وڃي فصلن تي وڏا خرچ ٿين ٿا ان حساب سان آبادگارن کي فصلن جي قيمت نٿي ڏني وڃي. سنڌ ۾ زراعت بدحالي جو شڪار آھي، ڪمند جي ھر شئي ڪارائتي آھي پر آبادگارن کي ملندڙ کنڊ جي حساب سان بہ پئسا نٿا ڏنا وڃن. جڏھن فصل لھن ٿا تہ انھن جا اگھ ڪيرايا وڃن ٿا۔ آبادگارن ۽ ھارين کي پنھنجي محنت جو اجورو بہ نٿو ملي. ھر زرعي فصل پوکڻ مھانگو ٿي ويو آھي.اياز لطيف پليجي چيو تہ ڪمند جي آبادگارن کي بقايائون نٿيون ڏنيون وڃن۔ ڪڻڪ لھي ٿي تہ باردانو گم ڪيو وڃي ٿو۔ سارين جو اگھ في مڻ 4,500 مان گھٽائي 2800 سو روپيا ڪيو ويو ۽ ٻين فصلن جا اگھ ڪيرائي آبادگارن ۽ ھارين کي ڪنگال ڪيو وڃي ٿو۔ اھا زراعت جي تباھي آھي، جنھن ڪري غربت وڌي وئي آھي۔ بدحالي سبب سنڌ ترقي بدران پوئتي وڃي رھي آھي۔ اياز لطيف پليجي چيو تہ سنڌ ۾ ڪرپشن کي حق سمجھيو وڃي ٿو، ڪالھ جا ڪنگال عوامي دولت لٽي ارب پتي ٿي ويا آهن ڪرپشن جي ڪينسر سنڌ سڄي ملڪ کي کوکلو ڪري ڇڏيو آهي. ڪرپشن ڪيسن کان بچڻ لاءِ پيپلزپارٽي ۽ زرداري مافيا سنڌ جي قيمت ادا ڪرڻ لاءِ تيار آهي پيپلزپارٽي ۽ زرداري جي مسلسل پندرهن سالن جي اقتداري دور ۾ سنڌ کي ڪنگال، برباد ۽ تباھ ڪري ڇڏيو. پورٽ ڪوئلو گئس، پيٽرول معدني وسيلن سان مالا مال سنڌ جا وارث اذيت واري زندگي گذاري رهيا آهن.