ڊي سي سجاول عبدالواجد شيخ جي صدارت ھيٺ اھم اجلاس

اجلاس ۾ اسڪولي عمارتن جي مرمت ۽ بحالي جي حوالي سان غور ويچار ڪيو ويو

سجاول (رپورٽر) ڊپٽي ڪمشنر سجاول جي صدارت هيٺ ضلعي ۾ موجود پرائمري، سيڪنڊري ۽ هائر سيڪنڊري اسڪولن جي مرمت ۽ بحاليءَ سميت سهولتن جي موجودگي کي يقيني بڻائڻ لاءِ ايم اينڊ آر تحت فنڊز جاري ڪرڻ لاءِ تجويزون فائنل ڪرڻ بابت اهم اجلاس ,ڊپٽي ڪمشنر سجاول عبدالواجد شیخ جي صدارت هيٺ ضلعي ۾ موجود پرائمري، سيڪنڊري ۽ هائر سيڪنڊري اسڪولن جي مرمت ۽ بحاليءَ سميت سهولتن جي موجودگي کي يقيني بڻائڻ لاءِ مئنٽيننس ۽ رپيئر (ايم اينڊ آر) تحت فنڊز جاري ڪرڻ لاءِ تجويزون فائنل ڪرڻ بابت اهم اجلاس منعقد ٿيو، جنهن ۾ ڊسٽرڪٽ اليڪشن ڪمشنر، ڊسٽرڪٽ ايجوڪيشن آفيسر سيڪنڊري ۽ پرائمري، ضلعي جي سمورن اسسٽنٽ ڪمشنرن، چيف مانيٽرنگ آفيسر، ايجوڪيشن ورڪس سول ۽ اليڪٽريشن، ڊسٽرڪٽ اڪائونٽس آفيس ۽ ٻين لاڳاپيل کاتن جي عملدارن شرڪت ڪئي. ان موقعي تي ڊپٽي ڪمشنر عبدالواجد شیخ اسسٽنٽ ڪمشنرن، چيف مانيٽرنگ آفيسر، اليڪشن ڪمشنر ۽ ايجوڪيشن ورڪس جي عملدارن کي هدايت ڪئي ته هو ضلعي جي سمورن اسڪولن ۾ سهولتن جي کوٽ بابت نشاندهي ڪرڻ لاءِ گڏيل سروي ڪري جلد رپورٽ پيش ڪن ته جيئن انهن اسڪولن جي مرمت، بحالي ۽ گهربل سهولتن جي موجودگي کي يقيني بڻائڻ لاءِ ايم اينڊ آر فنڊز جاري ڪرڻ بابت تجويزون موڪلي سگهجن. هن ايجوڪيشن ورڪس کاتي جي عملدارن کي هدايت ڪئي ته هو فنڊز جاري ٿيڻ بعد خاص طور تي پولنگ اسٽيشنز لاءِ مقرر ڪيل اسڪولن ۾ اوليت جي بنياد تي سمورين گهربل سهولتن جي موجودگي کي يقيني بڻائڻ لاءِ جوڳا اُپاءُ وٺن ته جيئن اليڪشن دوران پولنگ عملي ۽ ووٽرن کي ڪنهن به قسم جي پريشاني کي منهن ڏيڻو نه پوي، ان ڏس ۾ ڪنهن به قسم جي ڪوتاهي برداشت نه ڪئي ويندي. ڊپٽي ڪمشنر چيو ته ايم اينڊ آر بجيٽ جاري ٿيڻ بعد ضلعي جي سمورن مرمت جوڳن اسڪولن جي مرمت، بحالي ۽ سهولتن کان وانجهيل اسڪولن ۾ گهربل سهولتن جي فراهمي کي يقيني بڻائڻ لاءِ هر ممڪن قدم کنيا ويندا ته جيئن شاگردن توڙي اُستادن کي تدريسي سرگرمين دوران بھتر، پرسڪون ۽ خوشگوار ماحول فراهم ٿي سگھي