گھارو واسڻ عورت جو بااثرن جي مبينا زيادتين خلاف مڪلي ۾ احتجاج

بااثر ڀتو نھ ملڻ تي زمين تي قبضي جون ڪوششون ڪري رھيا آھن، نوٽيس ورتو وڃي

ٺٽو(ڊر) گھارو جي رھواسڻ پروين زال ظفر اقبال آرائين بااثر ماڻھن جي زيادتين، سندس وڪرو ڪيل سروي زمين تي ڪيل قبضي جي ڪوششن توڙي کيس بلاجواز پريشان ڪرڻ واري عمل خلاف مڪلي پھچي صحافين اڳيان دانھيندي چيو آھي تہ سندس سروي زمين ديھ ڀانيرو تپو ٻاٻڙا ۾ اھي، جيڪا سندس مڙس ظفر اقبال جي نالي تي ستين فارم تي بہ داخل ٿيل آھي، جيڪا زمين ھن وڪرو ڪري ڇڏي آھي تہ بااثر شخص نظير خاصخيلي، نواز ممتاز خاصخيلي، محمد نواز آرائين، عبدالمجيد، عبدالحفيظ، عبدالواحد آرائين ۽ ٻين پاران کانئنس ڀتو گھريو ويو، نہ ڏيڻ تي ھو سندس ۽ سندس ٻچن جي جان جا ويري بڻجي کين پريشان ڪرڻ سميت کيس ۽ سندس ٻچن کي اغوا ڪرڻ جون ڌمڪيون ڏيئي ڪوڙن ڪيسن ۾ ڦاسائي قتل ڪرڻ چاھين ٿا. مسمات پروين آرائين الزام ھڻندي وڌيڪ چيو تہ مذڪورہ بااثر شخص ھاڻي سندس وڪرو ڪيل سروي زمين تي قبضي جون ڪوششون ڪري ڪوڙن ڪاغذن جي آڌار تي قبضو ڪرڻ چاھين ٿا، جنھن جون دانھون ڊي سي ٺٽو، ايس ايس پي ٺٽو ۽ ايس ايڇ او گھارو سميت ڊي اء جي حيدراباد، آء جي سنڌ، ڊي جي رينجرس کي لکت ۾ ڏنيون آھن، پر کيس انصاف ملي ناھي سگھيو ۽ نہ ئي کيس پريشان ڪندڙ بااثر ماڻھن خلاف حد جي پوليس ڪا ڪاروائي ڪرڻ لاء تيار آھي، جيڪا پڻ انھن جي ساٿاري بڻيل آھي، جنھن ڪري کيس خدشو آھي تہ ڏوھاري قسم جا ماڻھون کيس ڪنھن بہ وقت وڏو ڪو نقصان پھچائي سگھن ٿا، جيڪي ڪاروباري ماڻھن کي بليڪ ميل ڪري ڀتو وصول ڪرڻ سميت زمينن تي قبضا ڪرائي شريف ماڻھن کي تنگ ڪندا رھن ٿا، ھن نگران سنڌ حڪومت جي وڏي وزير، گھرو صوبائي وزير، ڊي آء جي حيدرآباد، آء جي سنڌ پوليس، ايس ايس پي ٺٽو، سيشن جج ٺٽو سميت سمورن وس وارن کان مطالبو ڪيو تہ سندس وڪرو ڪيل سروي زمين تي قبضي جو ڪوششون ڪري کين پريشان ڪندڙ بااثر ماڻھن خلاف ڪاروائي ڪري کيس سندس گھرڀاتين سميت تحفظ مھيا ڪري ساڻس انصاف ڪيو وڃي، ٻئي صورت ۾ انصاف لاء عدالت ۾ وينديس.