آءِ جي سنڌ پاران پوليس اھلڪارن جي اولاد لاءِ فنڊ قائم ڪرڻ جو فيصلو

اهلڪارن جي ٻارن لاءِ اسڪالر شپ فيسن ۾ وڌيڪ رياعت لاءِ اسڪولن، ڪاليجن ۽ يونيورسٽين سان رابطو ڪرڻ جي هدايت

ڪراچي(اسٽاف رپورٽر) آءِ جي سنڌ رفعت مختار راجا طرفان پوليس اهلڪارن جي ٻارن لاءِ ميريج گرانٽ ايڊوانس ۾ ڏيڻ ۽ فوت ٿيندڙ ملازمن جي ڪفن دفن لاءِ ريوالونگ فنڊ قائم ڪرڻ جو فيصلو، اهلڪارن جي ٻارن لاءِ اسڪالر شپ فيسن ۾ وڌيڪ رياعت لاءِ اسڪولن، ڪاليجن ۽ يونيورسٽين سان رابطو ڪرڻ جي هدايت، ڪالهه آءِ جي سنڌ جي صدارت هيٺ سي پي او ۾ اجلاس ٿيو. اجلاس ۾ سنڌ پوليس جي ملازمن جي ڀلائي بابت جاري مختلف معاملن ۽ قدمن جو جائزو ورتو ويو. پوليس ترجمان موجب اجلاس ۾ اي آءِ جي ويلفيئر سنڌ بريفنگ ڏني. اجلاس ۾ شهيدن ۽ فوت ٿيل پوليس آفيسرن ۽ جوانن جي خاندانن کي مالي امداد، معاونت، پوليس اسپتالن ۽ ڊسپينسرين مان مفت طبي امداد ۽ دوائن جي فراهمي، زخمي ۽ بيمار پوليس اهلڪارن لاءِ بحالي الائونس، پوليس اهلڪارن جي ٻارن کي اسڪولن، يونيورسٽين ۽ ٻين تعليمي ادارن ۾ ڏني ويندڙ اسڪالرشپس ۽ ٻين قدمن جو جائزو ورتو ويو اهلڪارن جي ٻارن ۽ خاص ڪري ڇوڪرين لاءِ اڳواٽ شادي جي گرانٽ ڏيڻ تي غور ڪيو ويو. آءِ جي سنڌ چيو ته هوشيار ۽ نمايان مارڪون کڻندڙ پوليس آفيسرن ۽ اهلڪارن جي ٻارن جي اسڪالر شپ فيس ۾ وڌيڪ رعايت لاءِ ڳالهايو وڃي، اي آءِ جي ويلفيئر اسڪالر شپ فراهم ڪندڙ اسڪولن، يونيورسٽين ۽ ٻين تعليمي ادارن سان رابطو ڪري. آءِ جي سنڌ چيو ته ڊيوٽي دوران فوت ٿيل پوليس ملازمن جي جنازي نماز لاءِ ريوالونگ فنڊ قائم ڪيو وڃي، جلد کان جلد دوائون خريد ڪري پوليس اسپتالن، ڊسپينسرين ۾ ورهايون وڃن. اجلاس ۾ ايڊيشنل آءِ جي فنانس/ ويلفيئر کان علاوه ڊي آءِ جي هيڊڪوارٽرز سنڌ، ڊي آءِ جي فنانس سنڌ، اي آءِ جي ويلفيئر، فنانس، ايڊمن ۽ لاجسٽڪ سي پي اوز پڻ شرڪت ڪئي.