ٺٽي ضلعي ۾ ڊپٽي ڪمشنر جي ھدايتن تي ذخيرو ڪندڙن خلاف ڪارروائيون

اسسٽنٽ ڪمشنرن ۽ پرائيس مئجسٽريٽن پاران 14 ڪارروائيون ڪيون ويون

ٺٽو( محمد شفيق ڀٽي) ڊپٽي ڪمشنر ٺٽو جي ھدايت تي اسسٽنٽ ڪمشنرن جون ضلعي جي سمورن تعلقن ۾ ذخيرا اندوزي ۽ اسمگلنگ خلاف ڪارروائيون - ٺٽو ڊپٽي ڪمشنر اسد علي خان جي هدايتن تي اسسٽنٽ ڪمشنرن / پرائس مئجسٽريٽن پاران ضلعي ۾ ذخيره اندوزي ۽ اسمگلنگ خلاف 14 ڪارروايون ڪيون جڏهن ته خلاف ورزي ڪرڻ تي 15 هزار رپيا ڏنڊ پڻ لاڳو ڪيو ويو. تفصيل موجب اسسٽنٽ ڪمشنر ٺٽو ٽريفڪ پوليس چوڪي سجاول روڊ ۽ ال شافي اسپتال ڀرسان ٻن هنڌن تي اوچتا ڇاپا هڻي گودامن کي چيڪ ڪيو جتان ڪو به ذخيرو ٿيل سامان هٿ نه آيو. اسسٽنٽ ڪمشنر گهوڙاٻاري پڻ ور شهر ۾ ٻن ھنڌن تي ذخيرہ اندوزي خلاف ڪارروائي ڪئي جتان پڻ ڪو به ذخيرو نه مليو جڏهن ته ريٽ لسٽ ظاهر نه ڪرڻ ۽ خلاف ورزي ڪندي وڌيڪ اگهہ وصول ڪرڻ تي 15 ھزار رپيا ڏنڊ لڳايو ويو. اهڙي ريت اسسٽنٽ ڪمشنر ميرپور ساڪرو پاران کنڊ، اٽي، ڀاڻ، خوردني تيل ۽ پيٽرول جي اسمگلنگ خلاف 10 آپريشن ڪيا ويا ۽ ڪو به ذخيرو يا اسمگل ٿيل سامان هٿ نه اچي سگهيو. ڊپٽي ڪمشنر اسد علي خان سمورن اسسٽنٽ ڪمشنرن / پرائس مئجسٽريٽن کي سختي سان هدايتون ڏنيون آهن ته ذخيره اندوزي ۽ اسمگلنگ خلاف سخت ڪارروائي ڪري روزانو جي بنياد تي رپورٽ پيش ڪئي وڃي. هن چيو ته ضلعي ۾ ڪنهن کي به ذخيره اندوزي ۽ اسمگلنگ جي اجازت ھر گز نه ڏني ويندي۔