ڪراچي جي گلستان جوھر مان اغوا ڄاڻايل ٻن ٻارڙن واري واقعي سندن پيءَ ملوث نڪتو

6ورھين جي ايمان فاطمھ ۽ 5 ورھين جي عشال فاطمھ کي پي آءِ اي ڪالوني مان مبينا اغوا ڪيو ويو ھو

ڪراچي (رپورٽر)ڪراچي جي گلستان جوهر مان ٻن ٻارن جي اغوا واري معاملي جا سي سي ٽي وي فٽيجز هٿ اچي ويا، اغوا ۾ سندن والد نڪتو . پي آءِ اي ڪالوني مان ٻن معصوم ڀينرن 06 ورهين جي ايمان فاطمه ۽ 05 ورهين جي عشال فاطمه کي مبينا طور تي پي آءِ اي ڪالوني ۾ قائم ٽيوشن سينٽر جي ٻاهران اغوا ڪيو ويو هو ميڊيا کي مليل سي سي ٽي وي فوٽيج ۾ ٻنهي معصوم ڀينرن کي ڪار # BVS-063جيڪا عماد پٽ ڊاڪٽر بچل خاصخيلي جي نالي تي رجسٽرڊ آھي، جنهن ۾ زبردستي اغوا ڪندي ڏسي سگهجي ٿو.مبينا اغوا ٿيل ٻنهي نينگرين جي امڙ ارم سومرو الزام مڙهيو ته سندن نياڻين کي هن جي اڳوڻي مڙس جنيد خاصخيلي پٽ ڊاڪٽر بچل خاصخيلي پنهنجي ماءُ نسرين خاصخيلي ڀينرن مسز رابيل ،ھمير سولنگي، مسز ڪنول ۽ عبير ميمن جي مدد سان اغوا ڪرايو آهي. مبينا اغوا ٿيل نينگرين جي نانَي جو چوڻ هو ته هن جي ڌيءَ ارم سومرو پنهنجي مڙس کان 18 مهينا اڳ عليدگي اختيار ڪري چڪي آهي،ڄامشورو جي معزز عدالت ٻار سندن امڙ جي حوالي ڪرڻ جو فيصلو پڻ ڏنو آهي پر ان باوجود جنيد خاصخيلي توهين عدالت ڪندي فيصلي جي ڀڃڪڙي ڪئي آهي . نينگرين جي امڙ ارم سومرو سي سي ٽي وي فٽيجز ملڻ بعد سنڌ هاءِ ڪورٽ ۾ توهين عدالت جي درخواست ڏئي ڇڏي آهي ، جنهن ۾ هن ڄاڻايو آهي ته هن جي ٻارن کي سندن والد غيرقانوني نموني اغوا ڪرائي پاڻ وٽ رکيو آهي.