عوامي تحريڪ ۽ سنڌياڻي تحريڪ پاران مڪلي کان ٺٽي تائين مارچ ۽ ڌرڻو

سنڌ جي زمينن تي والار، ڌارين جي آبادڪاري، ڊجيٽل آدمشماري خلاف ريلي ڪڍي وئي

ٺٽو( ڊر ) عوامي تحريڪ ۽ سنڌياڻي تحريڪ ضلعي ٺٽي طرفان سنڌ جي زمينن تي ٿيندڙ قبضن، پاڻي تي لڳندڙ ڌاڙن، وسيلن جي نيلامي، ڦر لٽ، مھانگائي، رياستي سردارن جي سرپرستي ۾ قائم ٿيل ڌاڙيل راڄ ۽ غير قانوني ڊجيٽل آدمشماري خلاف ھڪ احتجاجي وڏي ريلي پبلڪ پارڪ مڪلي کان عوامي تحريڪ ۽ سنڌياڻي تحريڪ جي اڳواڻن لال جروار، سلمي لاشاري، نور احمد ڪاتيار، ڏاڏا قادر رانٽو، شاھ محمد چانگ، مٺا خان لاشاري جي اڳواڻي ۾ ڪڍي ويئي، جيڪا مڪلي کان ٿيندي ٺٽي شهر پھتي، جتي ڌرڻو ھڻي روڊ بلاڪ ڪيو ويو، جيڪا ريلي ھڪ جلسي جي صورت اختيار ڪري ويئي، جنھن کي خطاب ڪندي عوامي تحريڪ جي مرڪزي صدر لال جروار. مرڪزي جنرل سيڪريٽري نور احمد ڪاتيار، عبدالقادر رانٽو، گهنور خان زئور، شاھ محمد چانگ، مٺا خان لاشاري، سلميٰ لاشاري، انور پالاري ۽ ٻين چيو ته هڪ سوچيل سمجهيل سازش تحت سنڌ جو گهيراءِ ڪيو ويو آهي، جهمپير، ڪينجهر، ڪوهستان، هاليجي تي قبضا ڪيا ويا آهن. هڪ طرف ڌارين کي هڪ رٿابندي تحت زمينون ڏيئي آباد ڪيو پيو وڃي تہ ٻئي طرف زرعي انقلاب جي نالي ۾ 13 لک ايڪڙ زمين ٻين ملڪن کي ڏني ويئي آهي. حڪمرانن ملڪ ۾ معيشت کي مضبوط ڪرڻ ۽ ترقي وٺرائڻ لاء ملڪ جا قومي ادارا ۽ زمينون ٻين ڪمپنين ۽ ملڪن کي وڪرو ڪري ملڪ کي مضبوط ڪرڻ ڀھاني ملڪ کي آء ايم ايف وٽ گروي ڪري مھنگائي جو طوفان کڙو ڪري ڇڏيو آھي. هنن چيو ته سنڌ ۾ پاڻي جي ھٿرادو کوٽ پيدا ڪئي ويئي آھي، ٺٽي جي پڇڙي وارن علائقن ڳاڙهو، ميرپور ساڪرو، ور، غلام الله، جنگي سر ۽ ٻين علائقن ۾ پاڻي ناهي، آبادگارن قرض کڻي ساريون پوکيون آهن، اهي سڪي سڙي تباھ ٿي ويون آهن. ھنن چيو تہ سنڌ ۾ قانون ۽ انصاف جي حڪمراني بدران ڌاڙيلن، سردارن ۽ پوليس جي ڳٺ جوڙ وارو نظام آهي. سردارن جا پاليل ڌاڙيل سري عام ماڻهو اغوا ڪري وڃن ٿا، انهن کي ڪابه رڪاوٽ ناهي. ڀنگ جا پئسا سردار، پوليس ۽ ڌاڙيل پاڻ ۾ حصا پتيون ڪري کڻن ٿا. هنن چيو ته هڪ سوچيل سمجهيل سازش تحت سنڌ کي ديوار سان لڳايو ويو آهي جيڪو ملڪي مفادن کي ناقابل تلافي نقصان پھچائيندو. ھنن گھر ڪئي تہ مھنگائي تي ڪنٽرول ڪري عوام کي جيئڻ جو حق ڏنو وڃي.