گهگهر جي ڳوٺن ۾ پاڻي جي شديد کوٽ خلاف علائقي واسين جو احتجاج

يوسي گھگھر آفيس جا دفتر بند، مسئلو حل نه ٿيو ته احتجاج جو دائرو وڌائڻ جي ڌمڪي

ملير (رپورٽ: عبدالرشيد مورجھريو) يوسي گھگھر جي ٽنڊو ڳوٺ ۽ ناٿو کوسو ڳوٺ جي رهواسين پاڻي جي سخت کوٽ خلاف يوسي آفيس آڏو احتجاجي مظاهرو ڪري آفيس جا دفتر بند ڪرائي ڌرڻو هنيو. احتجاج ۾ مردن، عورتن ۽ نوجوانن وڏي تعداد ۾ شرڪت ڪئي ۽ پاڻي جي فراهمي بحال ڪرڻ لاءِ سخت نعريبازي ڪئي، ان موقعي تي رحيم کوسو ۽ ٻين چيو ته گذريل هڪ سال کان سندن ڳوٺ پاڻي جي شديد بحران کي منهن ڏئي رهيو آهي، پر بار بار شڪايتن ۽ درخواستن باوجود لاڳاپيل اختيارين مسئلي جي حل لاءِ ڪو به عملي قدم نه کنيو آهي. هنن الزام هنيو ته چونڊيل نمائندا ۽ واسطيدار ادارا عوام جي بنيادي مسئلن کان لاتعلق بڻيل آهن، جنهن سبب رهواسي پيئڻ جي پاڻي لاءِ پريشان آهن ۽ مهانگي اگهه تي پاڻي خريد ڪرڻ تي مجبور ٿي ويا آهن، سندن چوڻ هو ته پاڻي نه هجڻ سبب روزاني زندگي سخت متاثر ٿي رهي آهي، جڏهن ته عورتن، ٻارن ۽ بزرگن کي سخت تڪليفن کي منهن ڏيڻو پوي ٿو. هنن مطالبو ڪيو ته پاڻي جي فراهمي کي فوري طور بحال ڪري مستقل بنيادن تي صاف پاڻي مهيا ڪيو وڃي، مظاهرين خبردار ڪيو ته جيڪڏهن سندن جائز مطالبا جلد قبول نه ڪيا ويا ته احتجاج جو دائرو وڌايو ويندو ۽ لاڳاپيل سرڪاري آفيسن سميت اهم شاهراهن تي به احتجاج ڪيو ويندو، جنهن جي سموري ذميواري لاڳاپيل اختيارين تي هوندي.