ميرپورخاص ۾ ڊويزنل ڪمشنر ۽ چيئرمين ڊويزنل انفورسمينٽ ڪميٽي جي صدارت ھيٺ اجلاس

حيسڪو اختيارين موجب بجلي چوري کي روڪڻ ۽ بقايا وصول ڪرڻ جي مهم کي جاري رکيو ويندو: فيصلو

ميرپورخاص(بيورورپوٽ ) ڊويزنل ڪمشنر ميرپورخاص ڊويزن ۽ چيئرمين ڊويزنل انفورسمينٽ ڪميٽي فيصل احمد عقيلي جي صدارت ۾ بجلي چوري جي روڪٿام ۽ بقاياجات جي وصولي لاءِ ڪمشنر ڪانفرنس هال ۾ بجلي چوري جي روڪٿام ۽ بقاياجات جي وصولي کي يقيني بڻائڻ جي سلسلي ۾ اجلاس ٿيو. ان موقعي تي ايڊيشنل ڪمشنر ون ڊاڪٽر علي نواز ڀوت، ايڊيشنل ڪمشنر ٽو سونو خان چانڊيو، ڊپٽي ڪمشنر ميرپورخاص ڊاڪٽر راشد مسعود خان، ڊپٽي ڪمشنر ٿرپارڪر عبدالحليم جاگيراڻي ايس ايس پي ميرپورخاص عادل ميمڻ، ايس ايس پي عمرڪوٽ عبدالخالق، ايس ايس پي ٿرپارڪر علي مردان کوسو سپرنٽينڊنٽ انجنيئر حيسڪو منظور علي مگسي، ايس ڊي او، ڊائريڪٽر انفارميشن ميرپورخاص غلام رضا کوسو ۽ ٻين آفيسرن پڻ شرڪت ڪئي. اجلاس ۾ فيصلو ڪيو ويو ته حيسڪو اختيارين موجب بجلي چوري کي روڪڻ ۽ بقايا وصول ڪرڻ جي مهم کي جاري رکيو ويندو، اهڙي طرح سمورن ضلعن ۾ ضلعي انفورسمينٽ ڪميٽيون جوڙيون وينديون ته جيئن بجلي چوري کي روڪڻ ۽ وصولي لاءِ مهم هلائي بجلي جون بقايائون ۽ درپيش مسئلا حل ڪري سگهجن ڊويزنل ڪمشنر ميرپورخاص فيصل احمد عقيلي حيسڪو عملدارن کي هدايت ڪئي ته هو بجلي چوري جي روڪٿام ۽ بقاياجات جي وصولي لاءِ عوام جي بهتر مفاد لاءِ آگاهي مهم هلائين ۽ هدايت ڪئي ته جيڪو به بجلي چوري ۾ ملوث هوندو ان خلاف ڪارروائي ڪئي وڃي. ۽ چيو ته روزاني ۽ هفتيوار رپورٽ ڪمشنر آفيس ميرپورخاص ڏانهن موڪلي وڃي. ان موقعي تي سپرنٽينڊنٽ انجنيئر حيسڪو ميرپورخاص ريجن منظور علي مگسي ٻڌايو ته بجلي چوري جي روڪٿام ۽ بقاياجات جي وصولي جي سلسلي ۾ ڪيل آپريشن دوران ميرپورخاص ريجن ۾ ڪل 54 ايف آءِ آر درخواستون موڪليون ويون، جن مان 30 . ميرپورخاص ۾ 19 ڊگهڙي ۾ ۽ عمرڪوٽ ۾ 5 ڄڻن تي بجلي چوري جا ايف آئي آر شامل آهن جن مان 26 بجلي چوري ۾ ملوث ماڻهن خلاف ايف آءِ آرز داخل ڪيون ويون، جنهن ۾ ميرپورخاص ۾ 10، ڊگهڙي ۾ 11 ۽ عمرڪوٽ ۾ 5 ايف آءِ آر داخل ڪيون ويون، جڏهن ته 28 ايف آءِ آرز تي ڪارروائي جو عمل پڻ جاري آهي.