اياز لطيف پليجي پيٽروليم ۽ بجلي جي وڌايل اگهن کي رد ڪري ڇڏيو

views | 02nd Sep 2023 • سنڌي خبرون

اڳوڻي پي ڊي ايم ۽ پ پ جي اتحادي حڪومت ملڪ کي آئي ايم ايف وٽ وڪڻي ڇڏيو: اياز لطيف پليجو

حيدرآباد(بيورو) قومي عوامي تحريڪ جي سربراھ اياز لطيف پليجي پيٽروليم ۽ بجلي جي وڌايل قيمتن کي رد ڪندي چيو آھي تہ اڳوڻي پي ڊي ايم ۽ پيپلز پارٽي جي اتحادي حڪومت ملڪ کي آئي ايم ايف وٽ وڪڻي ڇڏيو آھي. نگران حڪومت عوام دشمن معاشي پاليسين تي عمل ڪري رهي آهي. بي رحم ۽ بي حس حڪمرانن کي احساس ناهي تہ پيٽروليم.جون قيمتون وڌڻ ڪري پاڪستان جو 24 ڪروڙ عوام بک بدحالي جو شڪار ٿي مھانگائي جي گھاڻي ۾ پيڙجي رھيو آھي. پيٽرول ۽ بجلي جون قيمتون وڌائڻ عوام دشمني آھي. مھانگائي جو طوفان ملڪ کي ايٿوپيا بنائي ڇڏيندو. پئٽرول ۽ ڊيزل جون قيمتون وڌڻ سان زندگي جي ھر شئي مھانگي ٿي وڃي ٿي.اياز لطيف پليجي چيو تہ نگران حڪومت آئي ايم ايف جي حڪم تي روزانو عوام مٿان مھانگائي جا بم ڪيرائي ھارين، مزدورن ۽ پورھيتن کي تباھ ڪري ڇڏيو آھي. غريب عوام لاءِ ٻہ وقت جي ماني بہ مشڪل ڪري ڇڏي آھي. تيل ۽ بجلي جي قيمتن ۾ حد کان وڌيڪ اضافو ڪري اھو پيغام ڏنو ويو آھي تہ جن وٽ پئسو ناھي، جيڪي غريب آھن، انھن کي زندھ رھڻ جو ڪو حق ناھي، اھي ڀلي تڙپي تڙپي مري وڃن. ڳاٽي ٽوڙ مهانگائي غريب عوام جو جيئڻ جنجال ٿي ويو آھي. اياز لطيف پليجي چيو تہ اڳوڻن ڪرپٽ حڪمرانن عالمي مالياتي ادارن کان اربين ڊالر وٺي ڪرپشن ڪري لنڊن، آمريڪا، سوئيٽزرلينڊ ۽ ٻين محفوظ ملڪن ۾ عوام جي دولت منتقل ڪري ڇڏي ۽ 24 ڪروڙ عوام کي مقروض ڪري ڇڏيو آھي. تيل ۽ بجلي جون قيمتون وڌڻ سان مزدور، ھاري ۽ غريب جي زندگي بيھي رھي آھي، سفر مھانگو ٿي ويو آھي، جيڪا شئي ٽرانسپورٽ ذريعي مارڪيٽ تائين پھچي ٿي اھا وڌيڪ مھانگي ٿيڻ ڪري ماڻھو مان خريداري قوت ختم ٿيو وڃي. اياز لطيف پليجي چيو تہ ملڪ جي غدار جاگيردار شاھي، ويڪائو سرمائيدارن ۽ ڪرپٽ حڪمران ٽولن پنھنجن ذاتي مفادن خاطر ملڪ کي عالمي سامراجين، ڪرپٽ ۽ دھشتگرد مافيا وٽ گروي ڪري ڇڏيو آهي. ملڪ ۾ حقيقي تبديلي ۽ عوام جي خوشحالي لاءِ ضروري آهي تہ صرف چھرن کي بدلائڻ بجاءِ ھن نظام کي تبديل ڪيو وڃي. پاڪستان مسلسل بحرانن جو شڪار آھي. اياز لطيف پليجي چيو تہ پيٽرول ۽ بجلي جون قيمتون وڌائڻ عوام دشمني آھي، ماڻھن جو معاشي قتل آھي، انڪري فوري طور تي پيٽروليم ۽ بجلي جون وڌايل قيمتون واپس ورتيون وڃن.