ڪنڊيارو ڀرسان ھٿياربندن نوجوان کي گھر اندر گوليون ھڻي قتل ڪري ڇڏيو

نوجوان جي امڙ جي فرياد تي 4 ڄڻن مٿان ڪيس داخل

ڪنڊيارو ڀرسان گذريل رات ھٿياربندن نوجوان کي گھر اندر گوليون ھڻي قتل ڪري ڇڏيو, نوجوان جي امڙ جي فرياد تي 4 ڄڻن مٿان ڪيس داخل, خبر موجب ڪنڊيارو ڀرسان ڳوٺ حاجي خان گوپانگ ۾ گذريل رات دير سان نامعلوم ھٿياربندن 30 ورھين جي نوجوان راشد گوپانگ کي گھر اندر گوليون ھڻي زخمي ڪري فرار ٿي ويا جنھن کي زخمي حالت ۾ تعلقه اسپتال آندو پئي ويو ته رستي ۾ فوت ٿي ويو اطلاع ملڻ تي ڪنڊيارو پوليس لاش کي تحويل ۾ وٺي تعلقه اسپتال مان ضروري ڪاروائي بعد لاش وارثن حوالي ڪيو ويو جنھن کي وارث ڳوٺ کڻائي ويا نوجوان جو لاش گھر پھچڻ تي روڄ راڙو پئجي ويو ٻئي پاسي مقتول نوجوان راشد گوپانگ جي امڙ حاجاڻي جي فرياد تي نياڻي سميت ٻن سڃاتل ۽ ٻه اڻڄاتلن مٿان ڪنڊيارو ٿاڻي تي ڪيس داخل ڪيو ويو ڪيس ۾ شعبان ڪلھوڙو فاروق ڪلھوڙو ۽ 2 نامعلوم شامل آھن فريادڻ مسمات حاجاڻي ڪيس جي موقف ۾ ڄاڻايو آھي ته ٽي سال اڳ جوابدار شعبان ڪلھوڙو منھنجي ڌي کي اغوا ڪري شادي ڪئي ھئي ۽ ڪجھ عرصو اڳ منھنجي ڌي سان سندس مڙس ۽ ڏير وڙھيا ھيا جنھن بعد منھنجي ڌي مڙس کان ڪاوڙجي اسان سان رھندي ھئي ان ڳالھ تان جوابدار شعبان ۽ فاروق ڪلھوڙو منھنجي پٽ کي جان سان مارڻ جون ڌمڪيون ڏيندا ھيا گذريل رات اسان گھر ۾ ستل ھياسين ته جوابدار شعبان ڪلھوڙو فاروق ڪلھوڙو ۽ ٻه اڻڄاتل اسان جي گھر ۾ گھڙي ھٿيارن جي زور تي يرغمال ڪيو ۽ منھنجي پٽ راشد کي فائرنگ ڪري قتل ڪري فرار ٿي ويا آخري اطلاعن موجب ڪابه گرفتاري عمل ۾ نه اچي سگھي ھئي