قومي عوامي تحريڪ جي سڏ تي ڪارونجهر جي نيلامي خلاف حيدرآباد ۾ ريلي

حڪمران سنڌ جا ثقافتي ۽ تھذيبي ماڳ، زمينون، وسيلا وڪڻي رھي آھي، ڪارونجهر جي نيلامي قبول ناهي: اڳواڻ

حيدرآباد(بيورو) ڪارونجھر جي نيلامي خلاف قومي عوامي تحريڪ جي مرڪزي سڏ تي حيدرآباد ۾ سينيئر اڳواڻ ڊاڪٽع گلزار جماڻي، الطاف خاصخيلي، زينت سمون، نصرت خاصخيلي، آغا عباس پٺاڻ، غلام نبي سومرو، معشوق چانڊيو، نذير بليدي، ماجد عباسي جي اڳواڻي ۾ اولڊ ڪئمپس کان ريلي ڪڍي حيدرآباد پريس ڪلب اڳيان مظاھرو ڪيو. ان موقعي اڳواڻن خطاب ڪندي چيو تہ پيپلز پارٽي سنڌ جا ثقافتي ۽ تھذيبي ماڳ، زمينون، وسيلا وڪڻي رھي آھي. ڪرپشن لاءِ ڪارونجھر کي بہ نيلام ڪيو پيو وڃي. سنڌ جا ڪروڙين ماڻھو وسيلن کي تين وال ڪرڻ ۽ ڪارونجھر کي نيلام ڪرڻ خلاف احتجاج ڪري رھيا آھن ۽ رستن تي آھن. اڳواڻن چيو تہ ڪارونجھر سنڌ جو تھذيبي، ثقافتي ورثو آھي. ڪارونجھر امر روپلي ڪولھي جي مزاحمت جو مرڪز آھي. سنڌ جو عوام آصف زرداري کي ڪارونجھر نيلام ڪرڻ نہ ڏيندو. اڳواڻن چيو تہ پيپلزپارٽي ۽ زرداري مافيا سنڌ جي ماڻهن لاءِ روز نوان مسئلا، نوان خطرا، نوان عذاب پيدا ڪري رهي آهي. بلاول ڀٽو زرداري سنڌ کي ٻڌائي تہ پندرهن سالن کان پيپلز پارٽي جي حڪومت سنڌ کي ڇو لٽي برباد ڪري، ڪراچي کان ڄامشورو تائين زمينون وڪڻي، ساحلي پٽي ۽ ٻيٽ کپائي ۽ ڪارونجھر نيلام ڪري رھي آھن. سنڌي ماڻھن کي ديوار سان ڇو لڳايو پيو وڃي، سنڌ جي تباهي جي ذميوار پ پ پ حڪومت آهي جيڪا مسلسل پندرهن سالن کان وٺي اقتدار ۾ رھندي پئي اچي. ھنن جو سنڌ ۽ سنڌي ماڻهن سان ڪو بہ واسطو ناهي، پيپلزپارٽي اقتدار خاطر سدائين سنڌي ماڻهن جي پٺي ۾ خنجر ھنيا آھن. اڳواڻن چيو تہ ڪارونجھر جي نيلامي، ٻيٽن، زمينن ۽ ڳوٺن تي قبضا، اھي سڀ عمل صرف ڌاڙا ناھن، اھي سنڌين جي نسل ڪُشي جي گھڻ رُخي حڪمت عملي جا مختلف سوچيل سمجھيل مرحليوار قدم آھن. اڳواڻن مطالبو ڪيو تہ ڪارونجھر سميت سنڌ جي وسيلن کي نيلام ڪرڻ بند ڪيو وڃي.