ڪارونجهر جي نيلامي سنڌ جي نيلامي سمجهون ٿا: ڊاڪٽر نياز ڪالاڻي

هڪ بل ذريعي سنڌ جي مختلف ضلعن ۾ 13 لک ايڪڙ زمين خالي ڪرائي پوکائي لاءِ دفاعي ادارن کي ڏني پئي وڃي

خيرپور: خيرپور ۾ جسقم اڳواڻ ۽ جيئي سنڌ رهبر ڪاميٽي جي چيئرمين ڊاڪٽر نياز ڪالاڻي ۽ ٻين اڳواڻن پريس ڪلب ڪانفرنس ڪندي چيو آهي ته هنن چيو ته ڪارونجهر سنڌ جي ٿري ماڻهن جي جياپي جو مسئلو آهي ان جي نيلامي سنڌ جي نيلامي سمجهون ٿا هنن چيو ته سنڌ جي عوام جي شديد ردعمل کانپوءِ ڪارونجهر جي نيلامي کي منسوخ ڪيو ويو آهي ان جي باوجود جيڪڏهن ٻيهر اهڙي حرڪت ڪئي وئي ته سنڌ جا حلالي پٽ خاموش نه ويهندا هنن چيو ته قومي اسيمبلي ۾ ون ونڊو آپريشن جي نالي سان تڪڙو بل پاس ڪرايو ويو آهي جنهن تحت سنڌ جي مختلف ضلعن ۾ 13 لک ايڪڙ زمين خالي ڪرائي پوکائي لاءِ دفاعي ادارن کي ڏني پئي وڃي هنن چيو ته هي واحد ملڪ آهي جتي زمينون پوکائي لاءِ دفاعي ادارن جي حوالي ڪيون پيون وڃن جيتوڻيڪ دنيا جي ڪنهن به ملڪ جا دفاعي ادارا پوکون ناهن ڪندا، دراصل هي سنڌ جي زمينن تي قبضا ڪرڻ جي سازش آهي هنن چيو ته سنڌ وطن تان ڌارين جو قبضو ڇڏائڻ ۽ افغانين جي نيڪالي تائين مستقل جدوجهد جاري رکي ويندي جڏهن ته غير قانوني طور زمينن تي قبضن ۽ غير قانوني طور تي ڌارين جي آبادڪاري خلاف جدوجهد ڪندا رهنداسين ڀل رياست جون سختيون ڇونه برداشت ڪرڻيون پون هنن وڌيڪ چيو ته خيرپور ۾ 400 سئو ايڪڙ سنڌي ماڻهن جي زمين پٺاڻن کي وڪرو ڪري ڏني وئي آهي جيڪا پٺاڻن بلڊرن کي پن وڪرو ڪئي آهي اهڙي عمل جو مک جوابدار ڊپٽي ڪمشنر خيرپور آهي جيئي سنڌ قومي محاذ طرفان 22 اگسٽ تي ڊپٽي ڪمشنر آفيس اڳيان ڌرڻو هنيو ويندو هنن وڌيڪ چيو ته ٻه سال گذرڻ باوجود سکر پوليس معصوم ٻارڙي پريا ڪماري کي بازياب نه ڪرائي سگهي آهي، پوليس کاتي جو ڪم امن امان قائم رکڻ ۽ عوام جو تحفظ ڪرڻ آهي پر ان جي باوجود ماڻهو اغوا پيا ٿين هنن چيو ته ايس ايس پي سکر مغوي ٻارڙي پريا ڪماري جي وارثن سان واعدو ڪيو هو ته 10 محرم تائين هو پريا ڪماري کي بازياب ڪرائيندو پر ايس ايس پي جو واعدو وفا نه ٿيو آهي تنهنڪري 3 اگسٽ تي ايس ايس پي آفيس سکر اڳيان احتجاجي ڌرڻو هنيو ويندو