ملير: بُهه جي واپارين پاران لوڊنگ ۽ سپلائي بند ڪرڻ وارو اعلان

هڙتال جي پهرين ئي ڏينهن ڀينس ڪالوني ۽ ناگوري منڊي ۾ بُهه جون گاڏيون نه پهتيون

ملير (رپورٽ: عبدالرشيد مورجھريو) بُهه جي واپار ڪندڙ تاجرن پاران سنڌ پوليس، موٽروي پوليس ۽ ٽريفڪ پوليس جي مبينا ڳرن چالانن، رشوت خوري ۽ بلاجواز تنگ ڪرڻ خلاف 20 تاريخ کان بُهه جي لوڊنگ ۽ سپلاءِ بند ڪرڻ واري اعلان کان پوءِ ڪراچي ۾ بُهه جي سخت کوٽ پيدا ٿي وئي آهي. واپاري اڳواڻن موجب هڙتال جي پهرين ئي ڏينهن ڀينس ڪالوني ۽ ناگوري منڊي ۾ بُهه جون گاڏيون نه پهتيون، جنهن سبب ٻئي منڊيون تقريباً خالي نظر آيون. هنن ٻڌايو ته هڪ اڌ بنڊل کڻي پهتل گاڏي کي به احتجاج طور خالي ڪرايو ويو، جنهن سبب مارڪيٽن ۾ بُهه جي فراهمي مڪمل طور متاثر ٿي آهي. تاجرن جو چوڻ آهي ته پوليس ۽ ٻين لاڳاپيل ادارن طرفان بار بار ڳرا چالان ڪرڻ، مبينا رشوت طلب ڪرڻ ۽ بنا جواز تنگ ڪرڻ سبب هو سخت پريشان آهن، جنهن ڪري احتجاج طور سپلاءِ بند ڪرڻ جو فيصلو ڪيو ويو آهي. هنن چيو ته جيڪڏهن سندن جائز مطالبا تسليم نه ڪيا ويا ته احتجاج جو دائرو وڌيڪ وڌايو ويندو. واپارين خبردار ڪيو ته جيڪڏهن صورتحال جلد معمول تي نه آئي ته ڪراچي سميت ڀرپاسي وارن علائقن ۾ بُهه جي شديد کوٽ سبب مالوندن کي وڏين ڏکيائين کي منهن ڏيڻو پوندو، جڏهن ته کير جي پيداوار پڻ متاثر ٿيڻ جا امڪان آهن. بُهه جي واپارين سنڌ سرڪار، اعليٰ پوليس اختيارين ۽ لاڳاپيل ادارن کي اپيل ڪئي آهي ته معاملي جو فوري نوٽيس وٺي ساڻن ڳالهيون ڪيون وڃن، سندن جائز مسئلا حل ڪيا وڃن ۽ غير ضروري چالانن، مبينا رشوت خوري ۽ هراسان ڪرڻ واري عمل جو خاتمو آندو وڃي، جيئن بُهه جي سپلاءِ ٻيهر بحال ٿي سگهي ۽ شهر ۾ پيدا ٿيندڙ بحران کان بچي سگهجي.