ملير مينارٽي اتحاد جو اجلاس، ڊاڪٽر آڪاش ڪمار جي قتل جي مذمت

اجلاس ۾ گلشن حديد ۾ موبائل شاپ تان ڦر، گڏاپ ۾ ڌرمداس ڪرپلاني جي گهر تي ڌاڙي ۽ ڊاڪٽر آڪاش ڪمار جي قتل جي مذمت

ملير (رپورٽ: عبدالرشيد مورجھريو) ملير مينارٽي اتحاد جو اهم اجلاس مرڪزي جنرل سيڪريٽري سنتوش ڪمار ڀيل جي اڳواڻي ۾ رميش ڪمار هائوس، شاهه لطيف ٽائون ۾ ٿيو، جنهن ۾ پاڪستان پيپلز پارٽي مينارٽي ونگ سنڌ جي نائب صدر مکي اوڌا مل خصوصي شرڪت ڪئي. اجلاس ۾ رميش ڪمار اوڏ، سنديش ڪمار، ايشور لال ڀاڳڙي، سومار ڪولهي، سليم ڪولهي، گيانچند ڀيل، تماچي ڀيل، نعيم داس، ويرسي ڪڇي، ڪمبو ڪڇي، لڌا رام راٺوڙ، گوتم راٺوڙ، جان ٻائي، اشوڪ ڪمار، گهنشام، رتن ڀيل سميت ملير جي مختلف علائقن مان وڏي انگ ۾ ساٿين شرڪت ڪئي اجلاس ۾ ڪراچي ۾ تازو پيش آيل ٽن وڏين وارداتن، گلشن حديد ۾ موبائل شاپ تان ڦر، گڏاپ شهر ۾ ڌرمداس ڪرپلاني جي گهر تي ڌاڙي ۽ ڊاڪٽر آڪاش ڪمار جي قتل جي سخت لفظن ۾ مذمت ڪئي وئي ملير مينارٽي اتحاد جي اڳواڻن انتظاميا کي خبردار ڪندي چيو ته گڏاپ ٽائون ۾ ٿيل واردات خلاف اڃا تائين ڪا به اثرائتي ڪارروائي نه ڪئي وئي آهي. هنن ٽن ڏينهن جو الٽي ميٽم ڏيندي اعلان ڪيو ته جيڪڏهن جوابدار گرفتار نه ڪيا ويا ته هزارين ماڻهن جي شرڪت سان سپر هاءِ وي بند ڪري تاريخي ڌرڻو هنيو ويندو.