نوشهروفيروز ۾ ايس ايس اي آءِ پي تحت ڪميونٽي سان صلاح مشورو

مشاورتي سيشن ۾ ڇوڪرين لاءِ محفوظ ۽ جامع اسڪولي ماحول تي زور ڏنو ويو

نوشهروفيروز(ڊ ر)ايس ايس اي آءِ پي تحت تعلقا نو شھروفيروز ۾ ڪميونٽي سان صلاح مشورو، ڇوڪرين لاءِ محفوظ ۽ جامع اسڪولي ماحول تي زور .سنڌ سيڪنڊري ايجوڪيشن امپروومينٽ پراجيڪٽ (SSEIP)، جيڪو ايشيائي ترقياتي بئنڪ (ADB) جي مالي ۽ فني سهڪار سان حڪومتِ سنڌ جي اسڪول ايجوڪيشن اينڊ لٽريسي ڊپارٽمينٽ پاران هلندڙ هڪ اهم تعليمي سڌارن وارو پروگرام آهي، صوبي ۾ سيڪنڊري تعليم جي معيار ۾ بهتري، اسڪولي ڍانچي جي مضبوطائي ۽ تدريسي نظام ۾ جدت آڻڻ لاءِ سرگرم آهي. انهيءَ سلسلي ۾ مدرسا هائي اسڪول ۾ ڪميونٽي مشاورتي سيشن منعقد ڪيو ويو، جنهن ۾ ڇوڪرين لاءِ محفوظ، رسائي لائق ۽ سازگار تعليمي ماحول بابت تفصيلي خيالن جي ڏي وٺ ڪئي وئي.مشاورتي ويهڪ ۾ سياسي شخصيتن، ضلعي تعليم کاتي جي عملدارن، اسڪول مينيجمينٽ ڪاميٽي (SMC) جي ميمبرن، والدين خاص طور تي مائرن، نوجوان برادري جي نمائندن، شاگردياڻين، استادن ۽ ٻين مقامي اسٽيڪ هولڊرن وڏي انگ ۾ شرڪت ڪئي. شرڪت ڪندڙن زور ڀريو ته اسڪولن جي ڊزائن ۽ سهولتن ۾ صنفي حساسيت کي بنيادي حيثيت ڏني وڃي، جيئن ڇوڪريون بغير ڪنهن خوف يا رڪاوٽ جي تعليم حاصل ڪري سگهن. پي آءِ يو ايس ايس اي آءِ پي جي جينڊر اسپيشلسٽ مس فخرالنساءِ قمر ڀنڀرو سيشن دوران صنفي ضرورتن مطابق اسڪولي ڍانچي جي اهم پهلوئن تي روشني وڌي. هن چيو ته محفوظ چارديواري، ڇوڪرين لاءِ الڳ ۽ فعال صفائي جون سهولتون، جسماني طور خاص يا معذور شاگردن لاءِ آسان رسائي جا رستا، مناسب روشني ۽ هراسانگي يا صنفي مسئلن بابت محفوظ شڪايت جو نظام هڪ جامع ۽ بااعتماد تعليمي ماحول لاءِ لازمي عنصر آهن. هن وڌيڪ چيو ته ايس ايس اي آءِ پي جو مقصد رڳو عمارتون تعمير ڪرڻ نه، پر اهڙو تعليمي ماحول قائم ڪرڻ آهي جتي ڇوڪريون ۽ پسمانده شاگرد محفوظ ۽ بااعتماد نموني تعليم حاصل ڪري سگهن. پروگرام ذريعي ڪميونٽي جي شموليت ۽ مالڪي کي پڻ هٿي ڏني پئي وڃي، ته جيئن اسڪولن جي ترقياتي رٿابندي مقامي ضرورتن سان هم آهنگ بڻائي سگهجي. سيشن جي پڄاڻي تي شرڪت ڪندڙن پروگرام کي ساراهيندي پنهنجي ڌيئرن جي داخلا ۽ حاضري وڌائڻ لاءِ وڌيڪ محفوظ ۽ جامع اسڪولي ماحول قائم ڪرڻ جي حمايت جو اظهار ڪيو.