گلشن حديد ۽ ڀرپاسي جي ڳوٺن ۾ بجلي بند، پيئڻ جو پاڻي به اڻلڀ

شهرين ڪي اليڪٽرڪ آفيس اڳيان بلاول لاکو ۽ ٻين جي اڳواڻي ۾ ڌرڻو هنيو، نعريبازي

ملير(رپورٽ: عبدالرشيد مورجھريو) گلشن حديد سميت ڀرپاسي جي آبادين يار محمد ڳوٺ، پپري، گھگھر ڦاٽڪ ۽ ٻين علائقن ۾ ڪيترن ئي ڏينهن کان بجلي بند هجڻ ۽ اڻ اعلانيل لوڊشيڊنگ خلاف رهواسين پاران گلشن حديد ۾ قائم ڪي اليڪٽرڪ آفيس اڳيان احتجاجي مظاهرو ڪري ڌرڻو هنيو ويو۔ احتجاج جي اڳواڻي بلاول لاکو ۽ ٻين مقامي اڳواڻن ڪئي، جڏهن ته وڏي انگ ۾ علائقي واسين شرڪت ڪري ڪي اليڪٽرڪ انتظاميا خلاف سخت نعريبازي ڪئي۔احتجاج ڪندڙن چيو ته شديد گرميءَ جي موسم ۾ ڊگهي وقت تائين بجلي بند هجڻ سبب علائقي ۾ زندگي مفلوج بڻجي وئي آهي۔ گهرن ۾ پيئڻ جي پاڻيءَ جو سخت بحران پيدا ٿي ويو آهي، جڏهن ته ٻار، عورتون ۽ بزرگ سخت تڪليفن کي منهن ڏئي رهيا آهن۔ هنن الزام لڳايو ته ڪي اليڪٽرڪ طرفان بنا ڪنهن شيڊول جي اڻ اعلانيل لوڊشيڊنگ ڪئي پئي وڃي، جنهن سبب روزاني معمولات سخت متاثر ٿي رهيا آهن مظاهرين جو چوڻ هو ته ڪيترن ئي علائقن ۾ بجلي مڪمل طور بند هجڻ ڪري واٽر پمپس به نه هلي رهيا آهن، جنهن سبب ماڻهن کي پيئڻ جي صاف پاڻي لاءِ پريشاني کي منهن ڏيڻو پئجي رهيو آهي۔ هنن چيو ته بار بار شڪايتن باوجود ڪي اليڪٽرڪ عملدار سنجيده قدم کڻڻ لاءِ تيار ناهن۔ احتجاج ڪندڙن مطالبو ڪيو ته فوري طور تي بجلي بحال ڪري اڻ اعلانيل لوڊشيڊنگ جو خاتمو ڪيو وڃي، ٻي صورت ۾ احتجاج جو دائرو وڌايو ويندو۔ هنن حڪومت ۽ اعليٰ اختيارين کان پڻ مطالبو ڪيو ته علائقي واسين جي مسئلن جو نوٽيس وٺي ڪي اليڪٽرڪ کي پابند بڻايو وڃي ته جيئن شهرين کي بنيادي سهولتون فراهم ٿي سگهن۔