عمرڪوٽ ويجھو ڳوٺ ڀيڙيو لالا ٻاھ واقعي خلاف ڀيل برادري جو احتجاج، ميرپورخاص عمرڪوٽ روڊ بلاڪ، ٽريفڪ معطل

عمرڪوٽ (ڊ ، ر ) ڀيڙيو لالا ٻاھ جي رهواسي ڀيل برادري سان تعلق رکندڙ مردن، عورتن، نوجوانن ۽ بزرگن زخمين سان گڏ پريس ڪلب عمرڪوٽ آڏو احتجاجي مظاهرو ڪري سخت نعريبازي ڪئي، جنهن بعد احتجاج ڪندڙن ميرپورخاص عمرڪوٽ مين روڊ تي رسا ٻڌي روڊ مڪمل طور بلاڪ ڪري ڇڏيو، جنهن سبب ٻنهي پاسن کان گاڏين جون ڊگهيون قطارون لڳي ويون ۽ ٽريفڪ جو نظام سخت متاثر ٿيو، مظاهرين جي اڳواڻي لاکو ڀيل، موتي ڀيل، چيتن آسن ۽ مولچند ڀيل ڪئي، ان موقعي تي احتجاج ڪندڙن ميڊيا سان ڳالهائيندي الزام هنيو ته سندن ڳوٺ ڀيڙيو لالا ٻاھ ۾ ٻنيءَ تي کيڙي دوران مخالف ڌر جي ماڻهن هٿياربند حملو ڪري امولک ڀيل، موتي ڀيل ۽ سروڻ ڀيل کي سخت زخمي ڪري ڇڏيو، جن کي علاج لاءِ اسپتال منتقل ڪيو ويو، جڏهن ته زخمين کي انصاف جي اپيل لاءِ پاڻ سان گڏ احتجاج ۾ آندو ويو، مظاهرين وڌيڪَ چيو ته واقعي ۾ ملوث عمر ڀيل، رامچند ڀيل، شريف ۽ گيان سميت 15 ڄڻن خلاف ايف آءِ آر داخل ٿيل آهي، پر باوجود ان جي سٽي پوليس عمرڪوٽ جوابدارن کي گرفتار ڪرڻ لاءِ سنجيده قدم کڻڻ لاءِ تيار ناهي، جنهن سبب متاثر خاندان پاڻ کي غير محفوظ سمجهي رهيو آهي، احتجاج ڪندڙن چتاءُ ڏيندي چيو ته جيڪڏهن جوابدارن کي فوري طور گرفتار ڪري کين انصاف فراهم نه ڪيو ويو ته احتجاج جو دائرو وڌايو ويندو، جنهن جي سموري ذميواري لاڳاپيل اختيارين تي هوندي، هوڏانهن روڊ بلاڪ ٿيڻ سبب مسافرن ۽ ٽرانسپورٽرن کي سخت پريشاني کي منهن ڏيڻو پيو.