ميمڻ ڳوٺ ڀرسان رمضان جوڳي ڳوٺ ۾ پاڻي جي شديد کوٽ، رهواسين جو احتجاج

پاڻي کوٽ خلاف رهواسي روڊن تي نڪري آيا، انتظاميه کان جيئڻ جي بنيادي حق جي گهر

ملير (رپورٽ: عبدالرشيد مورجھريو) ميمڻ ڳوٺ لڳ يونين ڪائونسل درساڻو جي حدن اندر واقع رمضان جوڳي ڳوٺ ۾ پاڻي جو مسئلو انتهائي سنگين صورت اختيار ڪري ويو آهي، جتي سخت گرمي باوجود رهواسي پاڻي جي هڪ ڦڙي لاءِ پريشان آهن ۔ڳوٺاڻن موجب ڪيترن ئي ڏينهن کان صاف پيئڻ جو پاڻي ميسر ناهي، جڏهن ته گرمي جي شدت سبب روزمره جي زندگي سخت متاثر ٿي وئي آهي۔ عورتون، ٻار ۽ بزرگ پاڻي لاءِ پري پري تائين وڃڻ تي مجبور آهن، جنهن ڪري سندن صحت ۽ زندگي کي به خطرو لاحق ٿي رهيو آهي۔ڳوٺ جي رهواسين پيرل برفت، علي برفت ۽ ٻين صحافين سان ڳالهائيندي چيو ته هو پيپلزپارٽي جا پراڻا ۽ وفادار ورڪر آهن، پر افسوس جو اڄ تائين سندن بنيادي مسئلا حل ناهن ٿي سگهيا۔ هنن شڪايت ڪئي ته ڪيترائي ڀيرا چونڊيل نمائندن ۽ لاڳاپيل اختيارين کي آگاهه ڪيو ويو آهي، پر ڪو به سنجيده قدم نه کنيو ويو آهي۔هنن وڌيڪ چيو ته پاڻي جهڙي بنيادي ضرورت کان محرومي ناقابلِ برداشت بڻجي چڪي آهي، خاص ڪري هن سخت گرمي ۾ ننڍڙا ٻار ۽ بزرگ تمام گهڻي تڪليف ۾ آهن۔ڳوٺاڻن پيپلزپارٽي جي چيئرمين بلاول ڀٽو زرداري ، صوبائي ۽ ضلعي سطح تي چونڊيل نمائندن کي اپيل ڪئي آهي ته هو فوري طور تي نوٽيس وٺي رمضان جوڳي ڳوٺ سميت ڀرپاسي وارن علائقن ۾ پاڻي جي فراهمي کي يقيني بڻائين ۽ مستقل بنيادن تي حل ڪڍيو وڃي۔رهواسين خبردار ڪيو آهي ته جيڪڏهن سندن جائز مطالبا پورا نه ڪيا ويا ته هو احتجاج جو دائرو وڌائيندا ۽ پنهنجو آواز اعليٰ اختيارين تائين پهچائيندا۔