ملير ۾ مزدورن جي عالمي ڏهاڙي تي شاندار ريلي، سوين مزدورن جي شرڪت

عبدالخالق گندرو، اقبال جروار، ايڊووڪيٽ خالد تنيو، ايڊووڪيٽ عبدالله ٻپڙ ۽ ٻين ريلي جي اڳواڻي ڪئي

ملير (رپورٽ: عبدالرشيد مورجھريو) سنڌي مزدور تحريڪ پاران مزدورن جي عالمي ڏينهن جي موقعي تي رزاق آباد ۾ قومي شاهراھ کان عوامي پريس ڪلب ملير تائين هڪ وڏي ۽ ريلي ڪڍي وئي جنهن جي اڳواڻي سنڌي مزدور تحريڪ جي مرڪزي آرگنائيزر عبدالخالق گندرو، عوامي تحريڪ جي مرڪزي اڳواڻن اقبال جروار، ايڊووڪيٽ خالد تنيو، ايڊووڪيٽ عبدالله ٻپڙ، ضلعي صدر پرھ سومرو، محمد علي ساھڙ، عبدالجبار پليجو، ايڊووڪيٽ ساک سنڌو، ايڊووڪيٽ رستم ميراڻي سميت ٻين اڳواڻن ڪئي. ريلي ۾ وڏي انگ ۾ مزدورن، پورهيتن، شاگردن ۽ سجاڳ ٻار تحريڪ جي ٻارڙن شرڪت ڪئي ريلي بعد پريس ڪلب ۾ سڏايل مزدور ميڙاڪو ڪيو ان موقعي تي خطاب ڪندي اڳواڻن چيو ته يومِ مئي شڪاگو جي شهيد مزدورن جي قربانين جي ياد ۾ ملهايو وڃي ٿو، جتي ظالم سرمائيدارن مزدورن جي پرامن جدوجهد کي رت ۾ ٻوڙي ڇڏيو، پر انهن قربانين مزدورن کي پنهنجن حقن لاءِ جدوجهد جو شعور ڏنو.اڳواڻن چيو ته دنيا جي سموري ترقي مزدورن ۽ هارين جي پورهيي تي بيٺل آهي، پر افسوس جو مزدور اڄ به بک، بدحالي ۽ بيروزگاري جو شڪار آهن. هنن چيو ته عالمي سطح تي ٿيندڙ هر بحران جو وڏو اثر مزدورن، هارين، ننڍن واپارين ۽ پورهيتن تي پوي ٿو، جڏهن ته پاڪستان ۾ گذريل ٻن ڏهاڪن دوران هيٺين طبقي جي معاشي حالت وڌيڪ خراب ٿي آهي. هنن وڌيڪ چيو ته سرمائيدار طبقي جو معيشت ۽ قانون ساز ادارن تي قبضو هجڻ ڪري مزدورن جا حق لتاڙيا پيا وڃن، جڏهن ته اجورن ۾ حقيقي اضافو نه ٿيڻ سبب مزدور سخت معاشي دٻاءُ جو شڪار آهن. اڳواڻن حڪومت جي پاليسين تي تنقيد ڪندي چيو ته مزدورن کان روزگار جا بنيادي حق کسيا پيا وڃن، ۽ ڪارپوريٽ فارمنگ ذريعي زرعي مزدورن کي سندن وسيلن کان محروم ڪرڻ جون تياريون ٿي رهيون آهن. هنن مطالبو ڪيو ته قومي ادارن جي نجڪاري فوري طور بند ڪئي وڃي ۽ مزدورن کي سندن آئيني حق فراهم ڪيا وڃن. ريلي جي اڳواڻن مطالبو ڪيو ته مهانگائي تي ڪنٽرول ڪيو وڃي، مزدورن ۽ ڪاريگرن جي اجورن ۾ اضافو ڪيو وڃي، مقامي سطح تي صنعتون قائم ڪيون وڃن، سنڌي ماڻهن کي روزگار فراهم ڪيو وڃي، صحت ڪارڊ جاري ڪيا وڃن، زخمي مزدورن جي بحالي لاءِ خاص فنڊ قائم ڪيا وڃن، بند پيل ڪارخانا ٻيهر کوليا وڃن ۽ مزدورن جي ڏهاڙي گهٽ ۾ گهٽ 2000 رپيا مقرر ڪئي وڃي.ريلي پرامن نموني پنهنجي منزل تي پهچي جلسي ۾ تبديل ٿي وئي، جتي اڳواڻن مزدورن سان يڪجهتي جو اظهار ڪيو ۽ سندن حقن لاءِ جدوجهد جاري رکڻ جو عزم ورجايو.