عمرڪوٽ ۾ بٺن تي ڪم ڪندڙ مزدورن سان سندن عالمي ڏينهن ملهايو ويو

فائونڊيشن فار سسٽين ايبل ڊولپمينٽ اينڊ انوويشن پاران اسپارڪ آرگنائيزيشن جي سهڪار سان تقريب منعقد

عمرڪوٽ (رپورٽ:ڪانجي مل رکيسر) پهرين مئي مزدورن جي عالمي ڏينهن جي موقعي تي فائونڊيشن فار سسٽين ايبل ڊولپمينٽ اينڊ انوويشن پاران اسپارڪ آرگنائيزيشن جي سهڪار سان بٺن تي ڪم ڪندڙ مزدورن سان گڏ هڪ سادي پر باوقار تقريب منعقد ڪئي وئي، جنهن ۾ مزدورن جي حقن، ڀلائي ۽ بهتري بابت آگاهي فراهم ڪئي وئي، تقريب کي خطاب ڪندي اسپارڪ جي ڊسٽرڪٽ ڪوآرڊينيٽر عبدالرحمان پلي چيو تہ مزدور ڪنهن به سماج جي ترقيءَ جو اهم ستون آهن، خاص ڪري اهي مزدور جيڪي بٺن، ٻنين يا فيڪٽرين ۾ سخت حالتن ۾ پنهنجو روزگار حاصل ڪن ٿا، سي خراج تحسين جا حقدار آهن، ان موقعي تي فائونڊيشن جي ڊسٽرڪٽ ڪوآرڊينيٽر منظور ڪنڀر چيو تہ بٺن ۽ ٻين محنت طلب شعبن سان لاڳاپيل مزدورن کي تعليم، صحت ۽ مناسب اجرت جهڙيون بنيادي سهولتون فراهم ڪرڻ رياست ۽ سماج جي گڏيل ذميواري آهي، تقريب دوران مزدورن سان کليل ڳالهه ٻولهه پڻ ڪئي وئي، جتي هنن پنهنجي درپيش مسئلن بابت آگاهي ڏني، مزدورن ٻڌايو تہ گهٽ اجرت، ڊگها ڪم جا ڪلاڪ ۽ بنيادي سهولتن جي کوٽ سندن اهم مسئلا آهن، جن جي حل لاءِ لاڳاپيل ادارن کان عملي قدم کڻڻ جي گهر ڪئي وئي، تقريب جي آخر ۾ مزدورن جي خدمتن کي ڀيٽا پيش ڪئي وئي، جڏهن تہ منتظمين ان عزم جو اظهار ڪيو تہ مستقبل ۾ به اهڙيون سرگرميون جاري رکيون وينديون، جيئن مزدورن جي زندگين ۾ مثبت تبديلي آڻي سگهجي.