ڪاٺوڙ ۾ پاڻي جو بحران سنگين، شهري پريشان، پاڻي جي واحد پائپ لائين تي رش، ڪلاڪن تائين انتظار

سرڪاري اسڪيم جو پاڻي وڪرو ٿيڻ جا الزام، اختيارين کان نوٽيس جي گهر

ملير (رپورٽ: عبدالرشيد مورجھريو)ڪاٺوڙ شهر جي رهواسين لاءِ صاف پيئڻ جو پاڻي وڏو مسئلو بڻجي ويو آهي، جتي بازار وارا ۽ عام شهري پاڻي حاصل ڪرڻ لاءِ سخت تڪليفن کي منهن ڏئي رهيا آهن۔ مقامي ماڻهن موجب، علائقي جي هڪ وڏي جامع مسجد جي انتظاميا پاران مهرباني طور هڪ پائپ لائين ڪنيڪشن فراهم ڪيو ويو آهي، جنهن مان شهرين پاڻي ڀرين ٿا، پر هتي ايترو رش ٿي وڃي ٿو جو ماڻهن کي پنهنجي واري لاءِ ڪلاڪن جا ڪلاڪ انتظار ڪرڻو پوي ٿو۔ذريعن جو چوڻ آهي ته هاڻي هن واحد سهولت کي به بند ڪرڻ جو ڪوششون ٿي رهيون آهن، جنهن سبب رهواسين ۾ ڳڻتي وڌي وئي آهي۔ شهر ڀرسان موجود سرڪاري واٽر سپلاءِ اسڪيم بابت الزام آهي ته ان جو پاڻي منظم طريقي سان عوام تائين پهچڻ بدران ڪجهه دڪاندارن کي وڪرو ڪيو پيو وڃي۔ شهرين شڪايت ڪئي آهي ته هن اهم مسئلي تي لاڳاپيل ادارا بي ڌياني جو مظاهرو ڪري رهيا آهن، جنهن ڪري پاڻي جهڙي بنيادي ضرورت لاءِ ماڻهو دربدر ٿي رهيا آهن۔ رهواسين اختيارين کان مطالبو ڪيو آهي ته معاملي جو فوري نوٽيس وٺي، واٽر سپلاءِ نظام کي شفاف بڻايو وڃي ۽ شهرين کي بنا تڪليف صاف پيئڻ جو پاڻي فراهم ڪيو وڃي۔