ملير: بن قاسم پوليس پاران 4 جوابدارن کي گرفتار ڪرڻ جي دعويٰ

ملير(رپورٽ: عبدالرشيد مورجھريو) بن قاسم پوليس خفيه اطلاع جي بنياد تي ڪامياب ڪارروائي ڪندي بن قاسم ٿاڻي جي حدن اندر ريتي بجري چوري ڪندڙ 4 جوابدارن کي گرفتار ڪري ورتو آهي. پوليس موجب ڪارروائي دوران ريتي جي غيرقانوني سپلاءِ ۾ استعمال ٿيندڙ لوڊ ٿيل ڊمپر پڻ قبضي ۾ ورتا ويا. گرفتار جوابدارن جي سڃاڻپ عامر، سعيد، ڪمال الدين ۽ امير زمان جي نالن سان ٿي آهي. پوليس جو چوڻ آهي ته جوابدارن وٽان ريتي سان ڀريل 2 لوڊڊ ۽ ٻه ڊمپر هٿن ڪيا ويا آهن، جيڪي غيرقانوني سرگرمين ۾ استعمال ٿي رهيا هئا. ذريعن موجب گرفتار جوابدارن جو وڌيڪ ڪرمنل رڪارڊ پڻ چيڪ ڪيو پيو وڃي ته جيئن سندن ٻين ممڪن ڏوهن بابت به ڄاڻ حاصل ڪري سگهجي.پوليس جوابدارن خلاف قانون موجب ڪيس داخل ڪري وڌيڪ جاچ شروع ڪري ڇڏي آهي، جڏهن ته ملير پوليس طرفان ريتي ۽ بجري چورين خلاف زيرو ٽالرينس پاليسي تحت بنا وقفي ڪریک ڊائون جاري رکڻ جو اعلان ڪيو ويو آهي.اختيارين جو چوڻ آهي ته اهڙين غيرقانوني سرگرمين ۾ ملوث عنصرن خلاف سخت ڪارروائي جاري رهندي ته جيئن قانون جي بالادستي کي يقيني بڻائي سگهجي۔