ملير ندي مان نوجوان جو 2ڏينهن پراڻو لاش هٿ، علائقي ۾ ڏک ۽ خوف جي لهر

ملير (رپورٽ: عبدالرشيد مورجھريو) درساڻو ڇنو لڳ درمحمد ڳوٺ جي رهواسي نوجوان زهيب بلوچ جو لاش ملير ندي ۾ بيٺل گندي ۽ سيوريج جي پاڻي مان هٿ آيو آهي. لاش ملڻ کان پوءِ علائقي ۾ ڏک ۽ خوف جي لهر پکڙجي وئي، جڏهن ته وارثن ۽ ڳوٺاڻن جو وڏو انگ واقعي واري هنڌ تي پهچي ويو.پوليس موجب نوجوان جي لاش بابت اطلاع ملڻ شرط اهلڪار واقعي واري هنڌ پهتا ۽ لاش کي ندي ۾ بيٺل پاڻي مان ڪڍي پنهنجي تحويل ۾ ورتو. ابتدائي جائزي موجب لاش لڳ ڀڳ ٻه ڏينهن پراڻو معلوم ٿئي ٿو، جڏهن ته فوتي جي سڃاڻپ زهيب بلوچ ولد نامعلوم طور ڪئي وئي، جيڪو درساڻو ڇنو ڀرسان واقع درمحمد ڳوٺ جو رهواسي هو.پوليس لاش کي ضروري قانوني ڪارروائي ۽ پوسٽ مارٽم لاءِ اسپتال منتقل ڪري ڇڏيو آهي، جتي طبي معائني کان پوءِ موت جي اصل سببن بابت وڌيڪ ڄاڻ حاصل ڪئي ويندي. پوليس جو چوڻ آهي ته مختلف رخن کان جاچ شروع ڪئي وئي آهي ۽ پوسٽ مارٽم رپورٽ اچڻ کان پوءِ ئي واضح ٿي سگهندو ته نوجوان جو موت حادثاتي طور ٿيو، پاڻي ۾ ٻڏڻ سبب ٿيو يا معاملو ڪنهن ٻي نوعيت جو آهي.هوڏانهن علائقي واسين ٻڌايو ته نوجوان گذريل ڪجهه وقت کان گهر وارن جي نظرن کان اوجهل هو، جنهن سبب سندس وارث پريشاني ۾ مبتلا هئا. لاش هٿ اچڻ کان پوءِ گهر ۾ ڪهرام مچي ويو ۽ وارثن جي روئڻ ۽ دانهن سان ماحول سوڳوار بڻجي ويو. پوليس موجب واقعي بابت وڌيڪ جاچ جاري آهي ۽ سڀني امڪاني پهلوئن کي نظر ۾ رکي تحقيق ڪئي پئي وڃي، جڏهن ته وارثن کان پڻ ضروري معلومات ورتي پئي وڃي ته جيئن حقيقتن تائين پهچي سگهجي.