ملير: شهري جو پير سرهندي ڳوٺ ۾ مبينا صنعتي آلودگي، گئس بندش ۽ بيروزگاري خلاف احتجاج

ملير (رپورٽ: عبدالرشيد مورجھريو)ملير يونين ڪميٽي اسٽيل ٽائون جي علائقي پير سرهندي ڳوٺ ۾ قائم هڪ نجي صنعتي ڪمپني خلاف مقامي رهواسين سخت احتجاج ڪيو آهي رهواسين الزام لڳايو آهي ته ڪمپني طرفان ماحول کي سخت نقصان پهچايو پيو وڃي، جنهن سان گڏ مقامي آبادي کي به سنگين مسئلن کي منهن ڏيڻو پئجي رهيو آهي.مقامي ماڻهن موجب ڪمپني جو گندو ۽ ڪيميڪل ملا پاڻي کليل ميدانن ۾ ڇڏيو پيو وڃي، جنهن سبب نه رڳو ماحول آلودہ ٿي رهيو آهي، پر ان پاڻي جي استعمال سان ڪيترائي مال مويشي به مري چڪا آهن. رهواسين جو چوڻ آهي ته آلودگي سبب انساني جاني نقصان جا واقعا به پيش آيا آهن، جنهن سان علائقي ۾ سخت ڳڻتي پکڙيل آهي. علائقي جي نمائندي نويد جوکيو الزام لڳايو ته ڪمپني تي گئس چوري جا الزام سامهون اچڻ بعد لاڳاپيل ادارن جي ڪارروائي سبب پير سرهندي ڳوٺ جي گئس سپلائي بند ڪئي وئي آهي، جنهن ڪري گذريل چئن مهينن کان سوين گهر گئس جهڙي بنيادي سهولت کان محروم آهن. رهواسين جو وڌيڪ چوڻ آهي ته ان صورتحال سبب 100 کان وڌيڪ نوجوان بيروزگار ٿي ويا آهن، جڏهن ته ڪيترائي مزدور 20 کان 25 سال ڪمپني ۾ ڪم ڪرڻ باوجود گريجوئيٽي، پينشن ۽ ٻين قانوني حقن کان محروم آهن.مقامي سماجي حلقن ۽ متاثر شهرين مطالبو ڪيو آهي ته ماحوليات کاتو، سوئي سدرن گئس ڪمپني ۽ ليبر ڊپارٽمينٽ فوري طور معاملي جو نوٽيس وٺن، شفاف تحقيق ڪرائي وڃي ۽ متاثر ماڻهن کي انصاف فراهم ڪندي بنيادي سهولتون بحال ڪيون وڃن.