بلاول ڀٽو زرداري عوام سان ڪيل واعدا پورا ڪري رهيو آهي: ميئر ڪراچي مرتضيٰ وهاب

گلشنِ حديد واٽر سپلاءِ اسڪيم جو افتتاح، 5لک کان وڌيڪ آبادي کي پاڻي جي فراهمي

ملير (رپورٽ: عبدالرشيد مورجھريو) ميئر ڪراچي بئريسٽر مرتضيٰ وهاب پپري کان گلشنِ حديد تائين 5 ايم جي ڊي واٽر سپلاءِ اسڪيم جو افتتاح ڪري ڇڏيو، جنهن سان پنج لک کان وڌيڪ آبادي مستفيد ٿيندي. افتتاحي تقريب کي خطاب ڪندي مرتضيٰ وهاب چيو ته چيئرمين بلاول ڀٽو زرداري عوام سان جيڪي واعدا ڪري ٿو، اهي پورا به ڪري ٿو، گلشنِ حديد جي شهرين کي پنجاهه هزار گيلن پاڻي فراهم ڪيو ويو آهي، جڏهن ته ماضي ۾ اسٽيل ملز انتظاميه پاڻي بند ڪري شهرين کي مشڪلاتن ۾ وڌو هو۔هن چيو ته لڳ ڀڳ 50 ڪروڙ رپين جي لاڳت سان چار ڪلوميٽر ڊگهي نئين پائيپ لائين وڇائي وئي آهي، جنهن سان گلشنِ حديد ۽ اسٽيل ٽائون جي رهواسين کي مستقل پاڻي فراهمي ممڪن بڻبي۔ سندس چوڻ هو ته ڪراچي ۾ ڀتوخوري، چائنا ڪٽنگ ۽ بدامني جو خاتمو پيپلز پارٽي جي حڪومت ڪيو، جڏهن ته شاهراهِ ڀٽو سميت ٻيا ترقياتي منصوبا عوام کي سهولتون فراهم ڪري رهيا آهن۔