جهرڪ ويجهو حادثي ۾ عورت معصوم ڌيءَ سميت فوت

حادثي ۾ 25ورهين جي شمو ڪولهي ۽ سندس معصوم ڌيءَ فوت

ٺٽو(شفيق ڀٽي) ٺٽو حيدرآباد قومي شاهراهه تي جھرڪ ويجهو جھمپير موڙ وٽ تيز رفتار وين ۽ موٽر سائيڪل وچ ۾ خوفناڪ ٽڪر، عورت ۽ سندس پنج مهينن جي معصوم نياڻي فوت، مڙس سخت زخمي. اطلاعن موجب حادثو ان وقت پيش آيو جڏهن ٺٽو کان حيدرآباد ويندڙ تيز رفتار وين جھمپير موڙ وٽ موٽر سائيڪل سان ٽڪرائجي وئي. ٽڪر جي نتيجي ۾ موٽر سائيڪل تي سوار 25 ورھين جي شمو زال ڪانجي ڪولهي، اصل رهواسي مٽياري ۽ هن وقت ٻيلو ويران جھرڪ جي رهواسي، ۽ سندس پنج مهينن جي معصوم نياڻي ريشما ٿڏي تي ئي فوت ٿي ويون. حادثي ۾ فوتي عورت جو مڙس 28 ورھين جو ڪانجي ولد نارو ڪولهي سخت زخمي ٿي پيو. اطلاع ملندي ئي جھرڪ پوليس واقعي واري هنڌ پهچي زخمي کي فوري طور رورل هيلٿ سينٽر جھرڪ منتقل ڪيو. ڊاڪٽرن موجب زخمي کي ابتدائي طبي امداد فراهم ڪرڻ بعد سندس حالت ڳڻتي جوڳي هجڻ سبب وڌيڪ علاج لاءِ حيدرآباد ريفر ڪيو ويو. پوليس حادثي ۾ ملوث وين ڊرائيور کي گرفتار ڪري ورتو آهي، جڏهن ته فوتين جا لاش ضروري قانوني ڪارروائي بعد وارثن حوالي ڪيا ويا.