سجاول شهر جي مڇارا روڊ تي بجلي جي تار مان باهه ڀڙڪي پئي

سجاول (رپورٽر) سجاول شهر جي مڇارا روڊ تي اوچتو بجلي جي تار مان باهه ڀڙڪي پئي، جنهن سبب ڀرپاسي وارن علائقن ۾ خوف ۽ هراس پکڙجي ويو. افسوس جو فائر برگيڊ وقت سر واقعي واري هنڌ نه پهتي، جنهن ڪري سوشل ورڪر راجا شبير جان پنهنجي پاڙي جي نوجوانن ۽ دوستن سان گڏجي پنهنجي مدد پاڻ تحت وڏي همت ۽ بهادري سان باهه تي ضابطو آندو ۽ وڌيڪ نقصان ٿيڻ کان بچائي ورتو۔واقعي جي اطلاع ملڻ تي اسسٽنٽ ڪمشنر سجاول پڻ فوري طور تي واقعي واري هنڌ پهتو، جتي هن متاثر ٿيل گهرن جا نالا ۽ نقصان جا تفصيل نوٽ ڪيا۔ ضلعي هيڊڪوارٽر سجاول جهڙي اهم شهر ۾ اوچتن حادثن ۽ ايمرجنسي حالتن کي منهن ڏيڻ لاءِ بنيادي سهولتن جي کوٽ موجود آهي جيڪڏهن مقامي ماڻهن پنهنجي مدد پاڻ تحت قدم نه کڻن ها ته وڏو جاني ۽ مالي نقصان ٿي سگهي پيو۔ عوامي حلقن مطالبو ڪيو آهي ته شهر ۾ فائر برگيڊ ۽ ايمرجنسي سهولتن کي فوري طور تي فعال ۽ بهتر بڻايو وڃي ته جيئن مستقبل ۾ اهڙن حادثن کي بروقت ڪنٽرول ڪري سگهجي۔