عمرڪوٽ ۾ مهينو اڳ پرڻيل ناري جو گهر مان ٽنگيل لاش هٿ، وارثن جو قتل جو الزام، جاچ شروع

عمرڪوٽ (رپورٽ:ڪانجي مل رکيسر) عمرڪوٽ جي علائقي ڳوٺ ولهار اوڏ پاڙي ۾ مهينو اڳ پرڻيل نوجوان ناري جو گهر جي ڪمري مان مبينه طور ٽنگيل لاش هٿ اچڻ واري واقعي بعد علائقي ۾ ڏک ۽ خوف جي لهر ڇانئجي وئي، جڏهن ته وارثن ناري کي قتل ڪري واقعي کي خودڪشي جو رنگ ڏيڻ جو الزام هنيو آهي، خبر موجب ڳوٺ ولهار اوڏ پاڙي جي رهواسڻ ڪريمان زال سومار ڌيءَ ڪرشن اوڏ جو پنهنجي ئي گهر جي ڪمري مان ٽنگيل حالت ۾ لاش هٿ آيو، واقعي جي اطلاع تي سٽي پوليس واقعي واري هنڌ پهچي لاش تحويل ۾ وٺي سول اسپتال عمرڪوٽ منتقل ڪيو، جتي ضروري ڪارروائي بعد لاش وارثن حوالي ڪيو ويو، ناري جي مڙس ميڊيا سان ڳالهائيندي چيو ته هو مزدوري لاءِ گهر کان ٻاهر ويو هو، پٺيان اطلاع مليو ته سندس گهر واري جو لاش گهر جي ڪمري ۾ ٽنگيل حالت ۾ مليو آهي، هن چيو ته کيس خبر ناهي ته سندس زال اهڙو انتهائي قدم ڇو کنيو، ٻئي طرف فوتي ناري جي وارثن سخت احتجاج ڪندي الزام هنيو ته سندن ڌيءَ خودڪشي نٿي ڪري سگهي، پر کيس قتل ڪرڻ بعد لاش کي ٽنگي خودڪشي جو ڏيک ڏنو ويو آهي، هنن اعليٰ اختيارين کان مطالبو ڪيو ته واقعي جي شفاف جاچ ڪرائي جوابدارن خلاف قانوني ڪارروائي ڪري کين انصاف فراهم ڪيو وڃي، هوڏانهن پوليس جو چوڻ آهي ته ناري جو لاش پوسٽ مارٽم بعد وارثن حوالي ڪيو ويو آهي ۽ واقعي جي مختلف رخن کان جاچ ڪئي پئي وڃي، پوليس موجب وارثن جي مرضي ۽ پوسٽ مارٽم رپورٽ جي روشني ۾ وڌيڪَ قانوني ڪارروائي عمل ۾ آندي ويندي.