ملير: مراد ميمڻ سب ڊويزن ۾ اربين رپين جي سرڪاري زمينن تي مبينا قبضا

سرڪاري زمينن تي مبينا قبضا ڪري مينهن جا واڙا قائم ڪرڻ جو سلسلو تيزي سان جاري آهي: فيض محمد پالاري

ملير (رپورٽ: عبدالرشيد مورجھريو) مراد ميمڻ سب ڊويزن ۾ بحريا ٽائون ڀرسان سرڪاري زمينن تي مبينا طور پوليس ۽ روينيو عملي جي سرپرستي هيٺ هزارين ايڪڙ زمين تي قبضا ڪري ميهن جا واڙا قائم ڪرڻ جو سلسلو تيزي سان جاري آهي، جنهن سبب صدين کان وهندڙ ٿڌو ندي زهريلي بڻجي وئي آهي، جڏهن ته آس پاس جي 20 کان وڌيڪ ڳوٺن ۾ چمڙي ۽ ٻين خطرناڪ بيمارين پکڙجڻ جون شڪايتون سامهون اچي رهيون آهن۔ اهڙو انڪشاف ملير جي ناليواري سياسي، سماجي ۽ ڪاروباري شخصيت حاجي فيض محمد پالاري ڪيو آهي۔ هن الزام هنيو ته ديھ ڪونڪر ۽ ديھ کرکرو ۾ جميل ميمڻ ڪيٽل ڪالوني جي نالي تي اربين رپين جي سرڪاري زمين تي غير قانوني والار جاري آهي، جڏهن ته زمينن بابت مختلف عدالتن ۾ ڪيس هلندڙ ۽ اسٽي آرڊر موجود هجڻ باوجود قبضا ختم ناهن ڪرايا ويا۔حاجي فيض محمد پالاري چيو ته ميهن جا واڙا ٺهڻ سبب انهن جو گندو ۽ زهريلو پاڻي ٿڌو ندي ۾ ڇوڙ ڪيو پيو وڃي، جنهن ڪري ندي جو پاڻي آلودہ ٿي ويو آهي۔ هن دعويٰ ڪئي ته زهريلي پاڻي سبب چرند پرند ۽ چوپايو مال مرڻ لڳو آهي، جڏهن ته ڀرپاسي جي ڳوٺن ۾ خارش، چمڙي ۽ ٻين بيمارين ۾ واڌ ٿي رهي آهي۔هن وڌيڪ چيو ته ديھ کرکرو ۽ ديھ ڪونڪر ۾ بنا ڪنهن قانوني اجازت ۽ دستاويزن جي هزارين ايڪڙن تي واڙا ۽ اڏاوتون قائم ٿيڻ اهو ظاهر ڪري ٿو ته روينيو کاتو ۽ پوليس سڌي ريت قبضا مافيا جي سهولتڪاري ڪري رهيا آهن۔ هن سوال اٿاريو ته مختيارڪار رياض مغيري وڏي عرصي کان مقرر هجڻ باوجود قبضا روڪرائڻ ۾ ناڪام ڇو رهيو آهي۔حاجي فيض محمد پالاري ڊپٽي ڪمشنر ملير سميع الله شيخ کان مطالبو ڪيو ته اسسٽنٽ ڪمشنر انيس عباسي، مختيارڪار رياض مغيري ۽ تپيدار کان سخت پڇا ڳاڇا ڪئي وڃي ۽ سڄي معاملي جي شفاف انڪوائري ڪرائي وڃي۔ هن چيو ته روينيو آفيسرن اڳيان عدالتن جي حڪمن جو به احترام ختم ٿي ويو آهي ۽ قبضا مافيا سرڪاري سرپرستي هيٺ سرگرم آهي۔هن نيب، اينٽي ڪرپشن، ايف آئي اي ۽ ڪمشنر ڪراچي کان پڻ فوري نوٽيس وٺي غير قانوني قبضا ختم ڪرائڻ جو مطالبو ڪندي خبردار ڪيو ته جيڪڏهن جميل ميمڻ ڪيٽل ڪالوني جي آڙ ۾ ٿيندڙ قبضا خلاف ڪارروائي نه ڪئي وئي ته ڳوٺاڻا موٽروي تي ڌرڻو هڻندا۔