ملير ضلعو وڏي آبادي وارو ضلعو، پر بنيادي سهولتن کان محروم

ليکڪ؛ جمن پتافي

سنڌ جي اهم ۽ وڏي ضلعن مان هڪ ضلعو ملير اڄ به بنيادي سهولتن جي شديد کوٽ سبب پريشانين ۾ ورتل آهي۔ لکين آبادي رکندڙ هن ضلعي ۾ ترقي جا وڏا وڏا دعوٰي ته ڪيا وڃن ٿا، پر زميني حقيقت ڪجهه ٻي ئي ڪهاڻي بيان ڪري رهي آهي۔ عوام اڄ به ٽٽل رستن، کليل گٽرن، گندي پاڻي، صفائي جي کوٽ ۽ خراب نيڪال واري نظام سبب عذاب جهڙي زندگي گذارڻ تي مجبور آهي۔ ملير، ابراهيم حيدري، گڏاپ، شاھ لطيف، جوڳي موڙ، عبدالله ڳوٺ، پپري، گلشنِ حديد، قائدآباد ۽ ٻين ڪيترن ئي علائقن ۾ کليل گٽر ماڻهن لاءِ خطرو بڻيل آهن۔ گهٽين ۽ رستن تي بيٺل گندو پاڻي نه صرف اچ وڃ ۾ ڏکيائيون پيدا ڪري رهيو آهي، پر مختلف بيمارين کي پڻ جنم ڏئي رهيو آهي۔
خاص طور تي قائدآباد جو مين روڊ مڪمل طور تباهه ٿي چڪو آهي۔ هن اهم شاهراهه تي وڏا وڏا کڏا، ٽٽل رستا ۽ پاڻي بيهڻ روز جو معمول بڻيل آهن۔ صبح ۽ شام ٽرئفڪ جام سبب ماڻهو ڪلاڪن جا ڪلاڪ ڦاٿل رهن ٿا۔ موٽرسائيڪل سوار حادثن جو شڪار ٿين ٿا، جڏهن ته اسڪول وينون، ايمبولينسون ۽ عام شهري به سخت تڪليفن مان گذرن ٿا۔
ابراهيم حيدري جي سامونڊي علائقن ۾ به صفائي، پاڻي ۽ روڊن جا مسئلا سالن کان موجود آهن، جڏهن ته گڏاپ جي ڳوٺاڻن علائقن ۾ رهندڙ ماڻهو اڄ به بنيادي شهري سهولتن لاءِ ترسي رهيا آهن۔ ساڳي صورتحال ملير جي ڪيترن ئي علائقن ۾ به ڏسڻ ۾ اچي ٿي، جتي عوام بار بار شڪايتون ڪرڻ باوجود به مسئلا حل ٿيڻ جا منتظر آهن۔ افسوس جهڙي ڳالهه اها آهي ته انهن سمورن مسئلن بابت سوشل ميڊيا، اخبارن ۽ ٽي وي چينلن تي بار بار آواز اٿاريو ويو، پر عملي طور تي ڪو خاص قدم نظر نٿو اچي۔ عوام اڄ اهو سوال ڪرڻ تي مجبور آهي ته آخر ملير جا چونڊيل نمائندا ڪٿي آهن؟ ڇا سندن ذميواري رڳو چونڊن دوران ووٽ وٺڻ تائين محدود آهي يا عوامي خدمت به سندن فرضن ۾ شامل آهي؟
پاڪستان پيپلز پارٽي جا چونڊيل نمائندا ملير مان ڪامياب ٿي اقتدار تائين ته پهتا، پر اڄ ملير جي عوام پاڻ کي اڪيلو ۽ بي يار و مددگار محسوس ڪري رهي آهي۔ جيڪڏهن لکين آبادي رکندڙ ضلعي ۾ روڊ، پاڻي، نيڪال ۽ صفائي جهڙا بنيادي مسئلا به حل نٿا ٿي سگهن، ته پوءِ ترقي جا دعوٰي رڳو لفظن تائين محدود نظر اچن ٿا۔
ملير جي عوام اڄ به اميد سان پنهنجن نمائندن ڏانهن نهاري رهي آهي ته شايد سندن تڪليفن جو ازالو ڪيو وڃي۔ ماڻهن کي رڳو تقريرون يا واعدا نه، پر عملي ڪم گهرجي۔ ڇو ته ترقي يافته ملير رڳو بيانن سان نه، پر ايماندار ۽ عملي قدمن سان ئي ممڪن بڻجي سگهي ٿو۔ هاڻي وقت اچي ويو آهي ته لاڳاپيل ادارا ۽ چونڊيل نمائندا پنهنجي ذميوارين جو احساس ڪن، ڪرسيون ڇڏي ميدان ۾ نڪرن ۽ ملير جي عوام کي اهي بنيادي سهولتون فراهم ڪن، جيڪي سندن آئيني ۽ انساني حق آهن۔لي قدمن سان ئي ممڪن بڻجي سگهي ٿو۔
هاڻي وقت اچي ويو آهي ته لاڳاپيل ادارا ۽ چونڊيل نمائندا پنهنجي ذميوارين جو احساس ڪن، ڪرسيون ڇڏي ميدان ۾ نڪرن ۽ ملير جي عوام کي اهي بنيادي سهولتون فراهم ڪن، جيڪي سندن آئيني ۽ انساني حق آهن۔