دڙي واسي بيواهه عورت جو ڌي ۽ پٽ سميت سجاول ۾ احتجاج

مڙس جي فوت ٿيڻ بعد ويڳي پٽ جيئڻ جنجال ڪري ڇڏيو آهي: زاھدان ميمڻ

سجاول (گلشيرميربحر) دڙي واسي بيواهه عورت زاھدان ميمڻ پنهنجي نياڻي نازش ۽ پٽ اسد سان گڏ احتجاج ڪندي ميڊيا آڏو پنهنجو درد ڀريو احوال بيان ڪيو. هنن چيو ته سندس مڙس جي وفات کان پوءِ سندن زندگي عذاب بڻجي وئي آهي ۽ ويڳي پٽ سندس جيئڻ جنجال ڪري ڇڏيو آهي.زاھدان ميمڻ موجب جنهن گهر ۾ هو رهائش پذير آهن، ان مان کين زبردستي بيدخل ڪرڻ جون ڪوششون ڪيون پيون وڃن. هن الزام هنيو ته جوابدار روزانو سندن گهر جي بجلي ڪٽي ڇڏي ٿو، جنهن ڪري هو ۽ سندس ٻار سخت پريشاني کي منهن ڏئي رهيا آهن. هن وڌيڪ ٻڌايو ته سندس مڙس جي ڇڏيل زمين تي پڻ قبضي جون ڪوششون ڪيون پيون وڃن ۽ کيس بار بار هراسان ڪيو پيو وڃي. هن چيو ته جوابدار مٿس زور ڀري رهيو آهي ته هو نادرا ۾ لکي ڏئي ته “اويس” جيڪو سندس پٽ آهي، ان جو سندس مڙس جي ملڪيت ۾ ڪو به حصو ناهي، جيڪو سراسر زيادتي ۽ ناانصافي آهي. احتجاج دوران زاھدان ميمڻ مطالبو ڪيو ته نواز ميمڻ جيڪو کين تنگ ڪري رهيو آهي، ان خلاف فوري طور قانوني ڪارروائي ڪئي وڃي ۽ کين انصاف فراهم ڪيو وڃي. هن چيو ته هو اڳ به ڪيترائي ڀيرا ارباب وزير وٽ ويا آهن، جتي فيصلا به ٿيا، پر انهن فيصلن جون ڪاپيون اڃا تائين کين ناهن ڏنيون ويون.آخر ۾ هن اختيارين کي اپيل ڪئي ته سندن مسئلي جو جلد حل ڪڍيو وڃي ته جيئن هو پنهنجي ٻارن سان گڏ امن سان زندگي گذاري سگهن.