ملير ڪينٽ پوليس جي ڪارروائي، چوري ٿيل موٽر سائيڪلن ۾ ملوث 4 جوابدار گرفتار

مختلف علائقن مان چوري ٿيل موٽر سائيڪلون خريد ڪري ٻين هنڌن تي منتقل ڪندڙ جوابدار گرفتار ڪري ورتا: پوليس

ملير (رپورٽ: عبدالرشيد مورجھريو) ملير ڪينٽ پوليس انٽيليجنس ۽ ٽيڪنيڪل بنيادن تي ڪارروائي ڪندي چوري ٿيل موٽر سائيڪلن جي خريد و وڪري ۾ ملوث ٽولي جي سربراه سميت 4 جوابدارن کي گرفتار ڪري ورتو آهي۔پوليس موجب ملير ڪينٽ ٿاڻي جي حدن اندر ڳجهي اطلاع تي ڪارروائي دوران جوابدارن کي گرفتار ڪيو ويو۔ گرفتار جوابدار مختلف علائقن مان چوري ٿيل موٽر سائيڪلون خريد ڪري انهن کي ڳجهن هنڌن تي منتقل ڪندا هئا ۽ بعد ۾ هڪ خفيه ورڪشاپ يا ڪارخاني ۾ کڻي وڃي انهن جا اسپيئر پارٽس تبديل ڪندا هئا۔ ڪارروائي دوران پوليس جوابدارن جي قبضي مان 30 کان وڌيڪ چوري ٿيل موٽر سائيڪلن جا اسپيئر پارٽس برآمد ڪيا۔ برآمد ٿيل سامان ۾ 14 فيول ٽينڪ، 57 مڊ گارڊ، 31 ڪليمپس، چين ڪور، ٽائر، رِمز ۽ موٽر سائيڪل جا ٻيا ڪيترائي پارٽس شامل آهن۔پوليس موجب جوابدار چوري ٿيل موٽر سائيڪلن کي ٽوڙي انهن جا پارٽس مختلف گودامن ۽ ورڪشاپن ۾ وڪرو ڪندا هئا۔ ان کان علاوه اسپيئر پارٽس جي سپلاءِ لاءِ استعمال ٿيندڙ ٻه لوڊر رڪشا پڻ قبضي ۾ ورتا ويا آهن۔پوليس موجب جوابدارن وٽان چوري ٿيل ۽ ڦر ڪيل موٽر سائيڪلن جا چيسز پڻ هٿ ڪيا ويا آهن۔ ابتدائي جاچ دوران جوابدارن ڪيترين ئي چوري ٿيل موٽر سائيڪلن ۽ پارٽس جي خريد ۽ وڪري ۾ ملوث هجڻ جو اعتراف پڻ ڪيو آهي۔ گرفتار جوابدارن ۾ مريد حسين شامل آهي جيڪو هن ٽولي جو سرغڻو ٻڌايو وڃي ٿو، جڏهن ته ٻين گرفتار جوابدارن ۾ غلام، رياض ۽ محمد ساجد شامل آهن۔پوليس گرفتار جوابدارن خلاف قانون موجب ڪيس داخل ڪري وڌيڪ جاچ شروع ڪري ڇڏي آهي۔