عمرڪوٽ ويجهو نينگر جو ڦاهو لڳل لاش هٿ، وارثن پاران واقعو آپگهات قرار

ڳوٺ ولھار ۾ 9 ورهين جي رميش پُٽ ڏيون اوڏ جو گهر مان ڦاهو لڳل لاش مليو

عمرڪوٽ (ڪانجي مل رکيسر) عمرڪوٽ ويجهو ڳوٺ ولھار ۾ هڪ افسوسناڪ ۽ دل ڏاريندڙ واقعو پيش آيو، جتي 9 ورهين جو معصوم ٻار رميش پُٽ ڏيون اوڏ ڦاهي کائي پنهنجي زندگيءَ جو ڏيو اجهائي ڇڏيو، خبر موجب معصوم ٻار رميش جو پنهنجي ڀيڻ سان ڪنهن معمولي ڳالهه تي جهڳڙو ٿيو، جنهن کان پوءِ هو دل برداشتہ ٿي ويو ۽ گهر ۾ ڦاهي کائي پنهنجي زندگي ختم ڪري ڇڏي، واقعي کان پوءِ علائقي ۾ ڏک ۽ سوڳ جي لهر ڇانئجي وئي، ذريعن موجب ٻار جا والدين پيٽ جي پورائي لاءِ کپرو جي علائقي ۾ لاباري (مزدوري) تي ويل هئا، جڏهن ته ٻارن کي تعليم حاصل ڪرائڻ خاطر مامي وٽ ڇڏي ويا هئا، افسوسناڪ واقعي جي خبر ملندي ئي وارثن ۽ ڳوٺاڻن ۾ سخت ڏک ۽ غم پکڙجي ويو.