برطانوي ڊپٽي هاءِ ڪمشنر سان راجوير سنگهه سوڍو جي ملاقات

برطانوي هاءِ ڪميشن آفيس ۾ ٿيل ملاقات دوران اقليتن جي تحفظ ۽ گڏيل سهڪار کي هٿي ڏيڻ بابت تفصيلي ڳالهيون

ڪراچي /عمرڪوٽ(رپورٽ:ڪانجي مل رکيسر) سنڌ جي وڏي وزير جي خصوصي معاون براءِ انساني حقن راجوير سنگهه سوڍو برطانوي ڊپٽي هاءِ ڪمشنر مسٽر ٽام برج سان ڪراچي ۾ برطانوي هاءِ ڪميشن آفيس ۾ ملاقات ڪئي، ملاقات دوران انساني حقن جي واڌاري، اقليتن جي تحفظ ۽ گڏيل سهڪار کي هٿي ڏيڻ بابت اهم معاملن تي تفصيلي ڳالهيون ڪيون ويون، ان موقعي تي راجوير سنگهه سوڍو سنڌ حڪومت پاران انساني حقن جي تحفظ لاءِ کنيل قدمن بابت برطانوي ڊپٽي هاءِ ڪمشنر کي آگاهه ڪيو، هن چيو ته سنڌ حڪومت انساني حقن جي پاسداري ۽ خاص طور اقليتن جي تحفظ لاءِ عملي قدم کڻي رهي آهي ۽ ان سلسلي ۾ مختلف پاليسيون به متعارف ڪرايون ويون آهن، برطانوي ڊپٽي هاءِ ڪمشنر مسٽر ٽام برج سنڌ حڪومت جي ڪوششن کي ساراهيندي چيو ته انساني حقن جي فروغ لاءِ گڏيل تعاون انتهائي اهم آهي، هن چيو ته برطانيا پاڪستان، خاص طور سنڌ سان انساني حقن ۽ سماجي بهتري جي شعبن ۾ سهڪار جاري رکڻ چاهي ٿو، ملاقات دوران ٻنهي ڌرين انساني حقن جي تحفظ، اقليتن جي ڀلائي ۽ باهمي لاڳاپن کي وڌيڪَ مضبوط بڻائڻ بابت عزم جو اظهار پڻ ڪيو.