اسٽيل ٽائون موڙ ڀرسان نيشنل هاءِ وي تي غير قانوني ڪٽ هڻڻ سبب حادثا معمول بڻيل

ملير (رپورٽ: عبدالرشيد مورجھريو) اسٽيل ٽائون موڙ ڀرسان نيشنل هاءِ وي تي ٽي کان چار غير قانوني ڪٽ ٺاهڻ سبب ٽريفڪ جا سنگين مسئلا پيدا ٿي ويا آهن، جڏهن ته حڪومت، هاءِ وي اٿارٽي ۽ ٻين لاڳاپيل ادارن جي بي ڌياني ۽ غير ذميواري سبب هتي حادثا راز جو معمول بڻجي ويا آهن۔مقامي ذريعن موجب هن اهم شاهراهه تي بي ترتيب ٽريفڪ، واٽر ٽينڪرن جي وڏي تعداد ۽ هيوي ٽريفڪ جي اچ وڃ سبب صورتحال انتهائي خطرناڪ بڻجي چڪي آهي۔ شهرين جو چوڻ آهي ته انهن غير قانوني ڪٽن سبب گاڏيون اوچتو يوٽرن وٺن ٿيون، جنهن ڪري موٽر سائيڪل سوارن ۽ ٻين گاڏين لاءِ حادثن جو خطرو وڌي ويو آهي۔ان سلسلي ۾ اتي موجود ٽريفڪ اهلڪارن ٻڌايو ته اهي ڪٽ مبينا طور سٽي ڊسٽرڪٽ گورنمينٽ طرفان ويجهو موجود هائيڊرنٽ تان پاڻي ڀري نڪرندڙ واٽر ٽينڪرن کي روڊ جي ٻئي پاسي موڙڻ لاءِ ٺاهيا ويا آهن، ته جيئن ٽينڪر آساني سان گذري سگهن۔ پر ان عمل سبب عام ٽريفڪ سخت متاثر ٿي رهي آهي۔نيشنل هاءِ وي تي سفر ڪندڙ ڊرائيورن، موٽر سائيڪل سوارن ۽ مقامي رهواسين سخت ردعمل ظاهر ڪندي چيو آهي ته هي شاهراهه اڳ ئي ڪراچي جي مصروف ترين رستن مان هڪ آهي، پر غير قانوني ڪٽن ۽ واٽر ٽينڪرن جي وڌندڙ آمد رفت ان کي وڌيڪ خطرناڪ بڻائي ڇڏيو آهي۔ شهرين جو چوڻ آهي ته هتي روزانو حادثا پيش اچي رهيا آهن ۽ ڪيترائي ماڻهو زخمي ۽ فوت پڻ ٿي چڪا آهن۔متاثر شهرين حڪومت، نيشنل هاءِ وي اٿارٽي ۽ ٻين لاڳاپيل ادارن کان مطالبو ڪيو آهي ته فوري طور تي انهن غير قانوني ڪٽن کي بند ڪيو وڃي، واٽر ٽينڪرن جي اچ وڃ کي منظم ڪيو وڃي ۽ ٽريفڪ جي رواني بهتر بڻائڻ لاءِ مؤثر قدم کنيا وڃن ته جيئن قيمتي انساني جاني نقصان کان بچي سگهجي۔