ڪامريڊ ڄام ساقي جي ستين ورسي مڪلي جي جوڳي ڳوٺ ۾ ملهائي وئي

سنڌ ڪلچرل فورم سرتين پاران تقريب منعقد، ڪامريڊ ڄام ساقي جي جدوجهد تي کيس ڀيٽا پيش

ٺٽو (محمد شفيق ڀٽي)ملڪ جي مشهور هاري اڳواڻ ڪامريڊ ڄام ساقي جي ستين ورسي جي موقعي تي مڪلي جي جوڳي ڳوٺ ۾ سنڌ ڪلچرل فورم سرتين پاران هڪ تعزيتي ميڙاڪو ڪوٺايو ويو، جنهن ۾ ڪامريڊ ڄام ساقي جي جدوجهد کي ڀيٽا پيش ڪئي وئي. ان موقعي تي سرتين سٿ جي نگران ثنا صادق لاکو خطاب ڪندي چيو ته ڪامريڊ ڄام ساقي ملڪ ۾ هارين، مزدورن، پورهيتن سميت مظلوم ماڻهن جي حقن جي حاصلات، حقيقي جمهوريت ۽ انساني حقن جي بحالي لاءِ تاريخ ساز جدوجهد ڪئي. هن چيو ته نواز شريف ۽ ڄام صادق جي دورِ حڪومت ۾ ڪامريڊ ڄام ساقي سکر کان ڪراچي تائين امن مارچ ڪري انساني ۽ جمهوري حقن جي بحالي لاءِ بهادراڻي جدوجهد ڪئي. هن وڌيڪ چيو ته ڪامريڊ ڄام ساقي آمريت توڙي بظاهر جمهوري دورن ۾ قيد و بند جون سختيون برداشت ڪيون پر آمرن ۽ ڏاڍ ڪندڙ قوتن آڏو ڪڏهن به نه جهڪيو. ميڙاڪي دوران شرڪت ڪندڙ سرتين ۽ ٻارڙن ڪامريڊ ڄام ساقي جي تصوير ۽ شاهه جي رسالي تي گلن جي ورکا ڪري سندس انقلابي جدوجهد کي ڀيٽا پيش ڪندي عظمت ڀريو سلام پيش ڪيو. ان موقعي تي ڊاڪٽر حجاب فاطمه، ساران علي، ڪائنات جوکيو، ڪامريڊ بختاور سميت معصوم ٻارڙا پڻ موجود هئا.