گڏاپ سٽي اسپتال جي ايم ايس ڊاڪٽر انيلا قريشي کي صحت کاتي ۾ رپورٽ ڪرڻ جو حڪم

ملير (رپورٽ: عبدالرشيد مورجھريو) گورنمينٽ آف سنڌ هيلٿ ڊپارٽمينٽ پاران 50 بسترن واري اسپتال گڏاپ سٽي، ضلعي ملير ڪراچي جي ميڊيڪل سپرنٽينڊنٽ ڊاڪٽر انيلا قريشي کي فوري طور صحت کاتي ۾ رپورٽ ڪرڻ جي هدايت جاري ڪئي وئي آهي. جاري ڪيل نوٽيفڪيشن موجب ڊاڪٽر انيلا قريشي، جيڪا سينئر وومين ميڊيڪل آفيسر (بي ايس-19) طور خدمتون سرانجام ڏئي رهي هئي، کي فوري اثر سان ۽ ايندڙ حڪمن تائين صحت کاتي ۾ رپورٽ ڪرڻ لاءِ چيو ويو آهي. حڪم 28 فيبروري 2026 تي ڪراچي مان جاري ڪيو ويو آهي. نوٽيفڪيشن تي سيڪريٽري صحت طاهر حسين سانگي صحيون ڪيون آهن. ذريعن موجب ڪجهه ڏينهن اڳ سماجي اڳواڻ زمان جوکيو ۽ ٻين شهرين گڏاپ سٽي اسپتال ۾ دوائن جي کوٽ ۽ ٻين انتظامي معاملن بابت شڪايتون سامهون آنديون هيون. ان سلسلي ۾ اسپتال انتظاميا سان ڳالهه ٻولهه ۽ بحث پڻ ٿيو هو. معاملي جو نوٽيس ايم اين اي ڄام عبدالڪريم ۽ ضلعي انتظاميا پاران ورتو ويو هو. مقامي ذريعن موجب زمان جوکيو کي اسپتال انتظاميه 15 تي فون ڪرڻ بعد حراست ۾ ورتو ويو هو، جنهن جي اطلاع تي علائقي جا رهواسي، صحافي ۽ سماجي اڳواڻ گڏاپ ٿاڻي پهتا. بعد ۾ کيس آزاد ڪيو ويو. پوليس يا انتظاميا طرفان ان حوالي سان باقاعده بيان جاري نه ڪيو ويو آهي. ياد رهي ته گڏاپ سٽي جي سرڪاري اسپتال ۾ دوائن جي کوٽ ۽ بنيادي سهولتن بابت شڪايتون اڳ به سامهون اينديون رهيون آهن. صحت کاتي طرفان جاري ڪيل تازي حڪم بابت وڌيڪ سبب ظاهر نه ڪيا ويا آهن.