ٺٽي ۾ ايراني سپريم ليڊر جي شهادت ۽ ايران تي حملن خلاف ريلي ۽ ڌرڻو

وڪيلن پاران بليڪ ڊي ملهائڻ جو اعلان. شيعا حيدرِ ڪرار ۽ جماعت اسلامي طرفان ريلي ڪڍي ڌرڻو هنيو ويو

ٺٽو (محمد شفيق ڀٽي) ايران جي سپريم ليڊر جي شهادت تي احتجاجي ريلي، قومي شاهراهه تي ڌرڻو، وڪيلن پاران بليڪ ڊي جو اعلان. ٺٽي ۾ ايران جي سپريم ليڊر آيت الله سيد علي خامنه اي جي شهادت خلاف سخت ردعمل سامهون آيو. شيعا حيدرِ ڪرار ۽ جماعت اسلامي طرفان ايدهي سينٽر کان ٽريفڪ چوڪي ٺٽو تائين احتجاجي ريلي ڪڍي وئي، جنهن ۾ عالمن، مذهبي ۽ سياسي ڪارڪنن، سول سوسائٽي ۽ شهرين وڏي انگ ۾ شرڪت ڪئي. ريلي جي شرڪت ڪندڙن آمريڪا ۽ اسرائيل خلاف سخت نعريبازي ڪئي ۽ قومي شاهراهه تي ڌرڻو هڻي ٽريفڪ معطل ڪري ڇڏي. ڌرڻي سبب گاڏين جون ڊگهيون قطارون لڳي ويون، جڏهن ته پوليس جي نفري به موقعي تي موجود رهي. مقررِين خطاب ڪندي چيو ته ايران تي آمريڪي ۽ اسرائيلي بمباري کليل جارحيت آهي ۽ مسلم دنيا کي ان تي متحد ٿي آواز بلند ڪرڻ گهرجي. اڳواڻن جو چوڻ هو ته شهيد اڳواڻ هميشه ظلم خلاف ڊٽڻ جو پيغام ڏنو ۽ سندن جدوجهد امتِ مسلمه لاءِ مشعلِ راهه رهندي. هنن عالمي برادري کان مطالبو ڪيو ته خطي ۾ وڌندڙ ڇڪتاڻ جو فوري نوٽيس ورتو وڃي ۽ جنگي ڪارروايون بند ڪرايون وڃن. احتجاج ڪندڙن چيو ته اهڙا قدم عالمي امن لاءِ خطرو آهن ۽ جيڪڏهن عالمي طاقتون خاموش رهيون ته خطي ۾ وڌيڪ بيچيني ۽ عدم استحڪام پيدا ٿيندو. ٻئي طرف ٺٽو ضلعي بار ايسوسيئيشن به تعزيتي قرارداد منظور ڪندي شهادت تي گهري ڏک ۽ افسوس جو اظهار ڪيو آهي. صدر سيد اعزاز حسين شاهه پاران پهرين مارچ تي يومِ سياه ملهاڻ ۽ 2 مارچ تي ضلعي ٺٽو جي عدالتن ۾ هڙتال جو اعلان ڪيو ويو آهي.