ملير: خانگي ٽيڪسٽائل ملز انتظاميا ڪيترن ئي کي ملازم برطرف ڪري ڇڏيو

قومي عوامي تحريڪ جي اڳواڻن پاران سڀاڻي ملز جي گيٽ آڏو ڌرڻي جو چتاءُ

ملير (رپورٽ: عبدالرشيد مورجھريو) قومي عوامي تحريڪ جي مقامي اڳواڻ ساجد گوريلو ۽ ضلعي ملير جي صدر جنسار هيسباڻي عوامي پريس ڪلب ملير ۾ پرهجوم هنگامي پريس ڪانفرنس ڪندي الزام هنيو ته خانگي ڪمپني ڪرائون ٽيڪسٽائل ملز جي انتظاميا ڪيترن ئي سالن کان ڪم ڪندڙ مزدورن کي جبري طور نوڪرين تان بيدخل ڪري ڇڏيو آهي۔هنن چيو ته اظهر علي جوکيو، شير محمد سولنگي، رحيم خان سميت وڏي تعداد ۾ مزدورن کي بنا جواز فارغ ڪيو ويو آهي، جيڪو مزدورن سان ناانصافي ۽ معاشي زيادتي آهي۔ ساجد گوريلو ٻڌايو ته برطرفين خلاف 3 مارچ تي فيڪٽري گيٽ آڏو احتجاج جو اعلان ڪيو ويو جنهن کان پوءِ ڪمپني جي جي ايم مشاهد، ايڊمن مينيجر محمود ۽ سندن ساٿاري غفار بلوچ پاران مبينا طور ڌمڪيون ڏنيون ويون ته احتجاج نه ڪيو وڃي۔هنن الزام هنيو ته غفار بلوچ دعويٰ ڪئي ته شاه لطيف پوليس اسٽيشن جو ايس ايڇ او سندس دوست آهي ۽ احتجاج ڪندڙن کي ڪوڙن ڪيسن ۾ ڦاسايو ويندو۔ اڳواڻن چيو ته اهڙيون ڌمڪيون جمهوريت ۽ مزدورن جي آئيني حقن تي سڌي حملو آهن۔پريس ڪانفرنس دوران ڊي سي ملير کي درخواست ڏيڻ جو پڻ اعلان ڪيو ويو ۽ سول سوسائٽي، انساني حقن جي تنظيمن ۽ اعليٰ اختيارين کان مطالبو ڪيو ويو ته غفار بلوچ سميت ذميوارن خلاف ڪارروائي ڪري مزدورن ۽ سياسي ڪارڪنن کي تحفظ فراهم ڪيو وڃي۔جنسار هيسباڻي خبردار ڪيو ته جيڪڏهن برطرف ڪيل مزدورن کي بحال نه ڪيو ويو ۽ ڌمڪيون بند نه ڪيون ويون ته احتجاج جو دائرو وڌايو ويندو