ملير ضلعي ۾ نائين ۽ ڏهين جا پيپر جاري، سينٽرز ۾ ڪاپي جي ڌم

سالياني امتحانن دوران سينٽر مبينا طور ڪاپي ڪرائڻ جا ڳڙهه بڻجي ويا

ملير (رپورٽ: عبدالرشيد مورجھريو) ملير ضلعي جي مختلف علائقن گلشن حديد، رزاق آباد، ملير سٽي، ميمڻ ڳوٺ ۽ ڀرپاسي وارن علائقن ۾ قائم نائين ۽ ڏهين جماعت جي سالياني امتحانن جا مرڪز مبينا طور ڪاپي ڪرائڻ جا ڳڙهه بڻجي ويا آهن، جتي کلي عام ڪاپي هلڻ جون شڪايتون سامهون اچي رهيون آهن. ذريعن موجب خاص طور تي سومار ڪنڊاڻي اسڪول سميت ڪيترن ئي ٻين اسڪولن ۾ ڪاپي جي ڌم متل آهي، جتي شاگردن کي بنا ڪنهن رڪاوٽ جي ڪاپي ڪرائي پئي وڃي.امتحاني مرڪزن اندر غير واسطيدار ماڻهن جي به وڏي انگ ۾ اچ وڃ جاري آهي، جڏهن ته پوليس جي موجودگي باوجود صورتحال تي ڪنٽرول نظر نٿو اچي.علائقي واسين جو چوڻ آهي ته امتحاني مرڪزن جي ٻاهران توڙي اندر مبينا طور تي گائيڊ بڪ، حل ٿيل پيپر ۽ ٻين ذريعن ذريعي شاگردن کي کليل مدد ڏني پئي وڃي، جنهن سبب ايماندار شاگردن جو حق متاثر ٿي رهيو آهي. والدين ۽ استادن پڻ خدشو ظاهر ڪيو آهي ته اهڙي صورتحال سان تعليم جو معيار وڌيڪ خراب ٿيندو ۽ شاگردن جي مستقبل سان کيڏ ٿيندي. سول سوسائٽي، تعليمي حلقن ۽ علائقي جي باشعور ماڻهن مطالبو ڪيو آهي ته ميمڻ ڳوٺ، گلشن حديد، رزاق آباد، ملير سٽي ۽ ٻين امتحاني مرڪزن تي فوري طور تي سپر ويجلينس ٽيمون موڪليون وڃن ۽ اوچتا ڇاپا هڻي ڪاپي جي رجحان کي روڪيو وڃي. هنن وڌيڪ مطالبو ڪيو ته امتحاني مرڪزن اندر غير واسطيدار ماڻهن جي داخلا تي پابندي لڳائي وڃي، ذميوار عملدارن ۽ اسڪول انتظاميا خلاف سخت ڪارروائي ڪئي وڃي ۽ شاگردن جو مستقبل تباھ ڪندڙ عنصرن کي قانون جي ڪٽهڙي ۾ آندو وڃي. سول سوسائٽي جو چوڻ آهي ته جيڪڏهن فوري قدم نه کنيا ويا ته ملير ضلعي ۾ تعليم جو نظام وڌيڪ تباهي طرف وڌندو ۽ ايماندار شاگردن سان ناانصافي جاري رهندي. علائقي واسين سنڌ ايجوڪيشن ڊپارٽمينٽ، بورڊ آف سيڪنڊري ايجوڪيشن ۽ ضلعي انتظاميا کان مطالبو ڪيو آهي ته معاملي جو نوٽيس وٺي فوري ڪارروائي ڪئي وڃي ته جيئن امتحانن جي شفافيت کي يقيني بڻائي سگهجي.